ශ්‍රී ලංකා මහ කොමසාරිස් කාර්යාලය ඇතුළු ලන්ඩනයේ පිහිටි විදේශ තානාපති කාර්යාල විශාල ප්‍රමාණයක් වාහන තදබදය අඩු කිරීම සඳහා ගෙවිය යුතු ගාස්තුව වන (Congestion Fee) පවුම් මිලියන ගණනක මුදලක් රටට ගෙවිය යුතු බව බ්‍රිතාන්‍ය විදේශ කාර්යාලය නිවේදනයක් නිකුත් කර තිබෙනවා.
පාර්ලිමේන්තු උප ලේකම් (විදේශ, පොදුරාජ්‍ය මණ්ඩලීය සහ සංවර්ධන කාර්යාලය) ඩේවිඩ් රට්ලි එක්සත් රාජධානියේ පාර්ලිමේන්තුවට ලිඛිත පිළිතුරක් දෙමින් කියා සිටියේ දැන් මුළු ණය ප්‍රමාණය පවුම් මිලියන 145 කට වඩා වැඩි බවයි.
ඒ අනුව, ලන්ඩනයේ ශ්‍රී ලංකා මහ කොමසාරිස් කාර්යාලය ගෙවිය යුතු මුළු හිඟ මුදල ලෙස පවුම් 652,120ක් ගෙවිය යුතු බව සඳහන්.
කෙසේ වෙතත්, උප ලේකම් රට්ලිට අනුව, රාජ්‍යතාන්ත්‍රික දූත මණ්ඩල සහ ජාත්‍යන්තර සංවිධාන ලන්ඩනයේ ක්‍රියාත්මක වාහන තදබද ගාස්තුවෙන් නිදහස් කිරීමට නීතිමය හේතු නොමැත.
එය වාහන නැවැත්වීමේ ගාස්තුවකට හෝ ඔවුන් ගෙවිය යුතු ගාස්තුවට සමාන බවයි පැවසෙන්නේ.
“රාජ්‍ය තාන්ත්‍රික සබඳතා පිළිබඳ වියානා සම්මුතිය යටතේ, රාජ්‍ය තාන්ත්‍රිකයන් රාජ්‍යයේ නීති සහ රෙගුලාසිවලට ගරු කිරීමට බැඳී සිටිනවා.
එබැවින් බ්‍රිතාන්‍ය රජය සියලුම රාජ්‍ය තාන්ත්‍රික දූත මණ්ඩල එක්සත් රාජධානියේ නීති සහ රෙගුලාසිවලට ගරු කරනු ඇතැයි අපේක්ෂා කරනු ලබන බව නිවේදනයේ සඳහන් වෙනවා.
එයට තදබදය ගාස්තු ගෙවීම ඇතුළත් බව ද එහි දැක්වෙනවා.
අනෙකුත් රටවල් අතර එක්සත් ජනපදය, ජපානය, පෝලන්තය, ප්‍රංශය සහ ජර්මනිය ද ඇතුළත් බව සඳහන්.
ලන්ඩන් තදබදය ගාස්තුව යනු මධ්‍යම ලන්ඩනයේ වාහන තදබදය සහිත කලාපය තුළ උදේ 7 සිට සවස 6 දක්වා ධාවනය වන බොහෝ මෝටර් රථ සහ මෝටර් වාහන සඳහා අය කරන ගාස්තුවකි.
