සැප්තැම්බර් 21 වැනිදා පැවැත්වෙන ජනාධිපතිවරණය ජාතික ජන බලවේගය ජයග්‍රහණය කළහොත් පාර්ලිමේන්තුව විසුරුවා හැර මහා මැතිවරණය පවත්වන තෙක් රටේ පාලනය කිසිවිටකත් ව්‍යවස්ථාවෙන් බාහිරව සිදු නොකරන බව ජාතික ජන බලවේගයේ ජනාධිපති අපේක්ෂක අනුර කුමාර දිසානායක මහතා අවධාරණය කර තිබෙනවා.
පසු ගිය දා සහභාගී වූ රූපාවහිනි සාකච්ඡාවක් අතරතුර මහා මැතිවරණයක් පැවැත්වෙන තුරු කාලසීමාවේ පාලනය සිදු කරන ආකරය පිළිබඳ මතුකළ ප්‍රශ්ණයකට පිළිතුරු දෙමින් ඔහු පැවසුවේ ඒ සඳහා ක්‍රම තුනක් පවතින බවයි.
ජනවරමේ බලය උපයෝගි කරගෙන ව්‍යවස්ථාව පසෙකින් තැබිමේ ක්‍රමයක් පවතින නමුත් තමා කිසිවිට එම ක්‍රමවේදය භාවිත නොකරන බව ඔහු කියා සිටියා.
“ව්‍යවස්ථාවට යටත්ව ඒ අන්තර්වාර කාල සීමාව පාලනය කිරීමේ ක්‍රම කිහිපයක් තිබෙනවා.එකක් තමයි මා ජනාධිපති වූ වහාම මගේ පාර්ලිමේන්තු ධුරය හිස් වෙනවා.එතනට අපි අලුත් කෙනෙක් පත් කරගත්තම මා ඇතුළු තව තුන්දෙනෙක් ඉන්නවා.අවශ්‍ය නම් ව්‍යවස්ථානුකූලයි.ඒ හතර දෙනාගෙන් කැබිනට් එක හදන්න පුළුවන්.
දෙවැනි අවස්ථාව,ජනාධිපතිවරයාට සියලුම විෂයන් පවරාගෙන රට ගෙනියන්න පුළුවන්.ව්‍යවස්ථාවට එකඟයි.
තුන්වෙනුව තියෙනවා අඔඉ කාලයක් තිස්සේ අපේක්ෂා කළා මැතිවරණයක් සාධාරණව පවත්වන්න නම් එක පක්ෂයකින් ආණ්ඩුවක් හැදෙනවා වෙනුවට අනිත් පක්ෂවල නියෝජිතයන්ගෙන් භාරකාර ආණ්ඩුවක් හදලා භාරකාර ආණ්ඩුවක් යටතේ මැතිවරණය පැවත්වීම වඩාත් ප්‍රජාතන්ත්‍රවාදියි.”
එබැවින් එම අවස්ථා තුනම පවතින නමුත් කැබිනට් එක ඒ මාසය තුළ හදිසිම අවස්ථාවක හැර රැස්වීම ද අනවශ්‍ය බව ඔහු කියා සිටියා.
