ලේකම්වරුන්ගේ ගැටලු ඇති දේශපාලන පක්ෂ පහකට මෙවර මහ මැතිවරණයට තරග කිරීම සඳහා අවසර නොදීමට මැතිවරණ කොමිසම තීරණය කර තිබෙනවා.
එහි සභාපති ආනන්ද රත්නායක මහතා පවසන්නේ ඇතැම් දේශපාලන පක්ෂවල ලේකම්වරු දෙතුන් දෙනා සිටින බවට තොරතුරු අනාවරණය වීමෙන් පසු එම නියෝජිතයන් කැඳවා පසුගිය දා සාකච්ඡා කළ නමුත් ගැටලු නිරාකරණය කර ගැනීමට මෙතෙක් ඔවුන්ට හැකිවී නැතිවීම හේතුවෙන් කොමිසම මෙම තීරණය ගත් බවයි.
අධිකරණය හරහා හෝ ගැටලුව නිරාකරණය කරගෙන පැමිණෙන ලෙස එම පක්ෂ පහේ නියොජිතයන්ට අනතුරුව දැනුම් දුන් බව ඔහු සඳහන් කළා.
මෙම පක්ෂ පහ සම්බන්ධයෙන් මැතිවරණ කොමිෂන් සභාවට පසුගිය කාලයේ පැමිණිලි ගණනාවක් ලැබී තිබුණා.
මේ අතර දේශපාලන පක්ෂ පහළොවක පමණ ලකුණු මාරු කිරීම් සහ නම් මාරු කිරීම් සම්බන්ධ ගැටලු පසුගිය දිනවල එම පක්ෂ නියෝජිතයන් කැඳවා විසඳූ බව මැතිවරණ කොමිසමේ සභාපතිවරයා වැඩිදුරටත් කියා සිටියා.
