එළැඹෙන මහ මැතිවරණය සඳහා ජාතික ජන බලවේගය දිස්ත්‍රික් මට්ටමින් නාමයෝජනා ලැයිස්තු සකස් කරමින් සිටින අතර අපේක්ෂකයින් අතර මනාප තරඟය වළක්වා ගැනීමේ යාන්ත්‍රණයක් සකස් කරමින් සිටින බව ජාතික ජන බලවේගයේ ප්‍රධාන ලේකම් වෛද්‍ය නිහාල් අබේසිංහ ඊයේ (04) ප්‍රකාශ කළා.
කෙසේ වෙතත් පාර්ලිමේන්තුවට තේරී පත්වන මන්ත්‍රීවරුන් සම්බන්ධයෙන් ජාතික ජන බලවේගය කිසිදු ආකාරයකින් මැදිහත් නොවන බවත්, මනාපයෙන් ජනතාව විසින් තෝරා පත් කර ගන්නා සියලුම මන්ත්‍රීවරුන් පාර්ලිමේන්තුවට පැමිණීමට වග බලා ගන්නා බව ඔහු මාධ්‍ය කළ විමසීමක දී කියා සිටියා.
“NPP තරඟකරුවන් අතර මනාප තරඟකාරීත්වය වළක්වා ගැනීම සඳහා අපි යාන්ත්‍රණයක් සකස් කරමින් සිටිනවා. අපි මැතිවරණයට තරග කරන සියලුම NPP අපේක්ෂකයන් හමුවී ඒ පිළිබඳව දැනුම් දෙනවා” ඔහු සඳහන් කළා.
අනෙකුත් පක්ෂවල මෙන් නොව ජාතික ජන බලවේගය නාමයෝජනා ලැයිස්තු දිස්ත්‍රික් මට්ටමින් සකස් කරමින් පවතින බවත් අවසන් කළ ලැයිස්තු කොළඹ ප්‍රධාන කාර්යාලයේදී සමාලෝචනය කරන බවයි අබේසිංහ මහතා සඳහන් කළේ.
සිය නාමයෝජනා ලැයිස්තුවට සහ ජාතික ලැයිස්තුවට වැඩි කාන්තා අපේක්ෂිකාවන් ඇතුළත් කරන අතර එම ලැයිස්තු දෙකටම තවත් වෘත්තිකයන් ද ඇතුළත් වනු ඇතැයි ඔහු කියා සිටියා.
මහ මැතිවරණය සඳහා නව පක්ෂ හෝ කණ්ඩායම් සමඟ සන්ධානගත වන්නේ දැයි විමසූ විට ඔහු කියා සිටියේ දේශපාලන පක්ෂ හෝ කණ්ඩායම් ජාතික ජන බලවේගය තුළට නොගන්නා බවත් NPP යටතේ තරඟ කිරීමට ඉල්ලීම් රාශියක් ලැබී ඇති අතර දිස්ත්‍රික් මට්ටමින් නාමයෝජනා මණ්ඩල විමසීමට ඒ අයට උපදෙස් ලබා දී ඇති බවයි.
