‘ක්ලෝර්හෙක්සීඩීන්’ නම් මුඛය පිරිසිදු කිරීමට භාවිත කරන විෂබීජ නාශක දියර බෝතල් 270,000 ක් මිලදී ගැනීම සඳහා රුපියල් මිලියන 37 (කෝටි 4 කට ආසන්න)වටිනාකමකින් යුත් ටෙන්ඩරයක් අසාධු ලේඛන ගත කර ඇති ඖෂධ නියාමන අධිකාරියේ ලියාපදිංචිය නැති සමාගමකට ප්‍රදානය කිරීමට රාජ්‍ය ඖෂධ සංස්ථාවේ ටෙන්ඩර මණ්ඩලය සූදානම් වන බව අනාවරණය කර තිබෙනවා.
වෛද්‍ය හා සිවිල් අයිතිවාසිකම් පිළිබඳ වෛද්‍යවරුන්ගේ වෘත්තිය සමිති සන්ධානයේ සභාපති වෛද්‍ය චමල් සංජීව මහතා මේ බව අනාවරණය කරමින් මෙම ටෙන්ඩරය පිළිබඳ වහාම විමර්ශනයක් කර අක්‍රමිතාවන්ට සම්බන්ධ නිලධාරීන්ට එරෙහිව නීතිය ක්‍රියාත්මක කරන ලෙස සෞඛ්‍ය අමාත්‍යවරයාගෙන් ඉල්ලීමක් කරනු ලැබුවා.
අදාල බංගලාදේශ සමාගම මෙරටට ගෙවිය යුතු රු මිලියන 130 කට ආසන්න මුදලක් නොගෙවීම මත මෙම සමාගම අසාධු ලේඛනගත කර ඇති බවයි සඳහන් වන්නේ.
‘ක්ලෝර්හෙක්සීඩීන්’ නැමති නිෂ්පාදනය සඳහා මෙම ටෙන්ඩරය ප්‍රදානය කරන විටත් ඖෂධ නියාමන අධිකාරියේ නිසි ලියාපදිංචිය හෝ ලොව පිළිගත් ලොව පිළිගත් ලෝක සෞඛ්‍ය සංවිධාන රසායනාගාරයක ප්‍රමිති සහතිකය අදාළ සමාගම ගෙන නොමැති බව වෛද්‍ය චමල් සංජීව මහතා අනාවරණය කර තිබෙනවා.
පසුගිය දෙසැම්බර් මාසයේ නව රජය පත්කළ නිලධාරීන් විසින් මෙම ගණුදෙනුව සිදු කර ඇති බැවින් වහාම මේ සම්බන්ධයෙන් විමර්ශනයක් සිදු කර අක්‍රමිකතාවක් සිදු වී වගකිව යුතු නිලධාරීන් සම්බන්ධ පියවර ගනු ඇතැයි බලාපොරොත්තු වන බව වෛද්‍ය චමල් වැඩිදුරටත් සඳහන් කර සිටියා.
