2014 දී Kaththi චිත්‍රපටය නිර්මාණය කරමින් දෙමළ සිනමාවට පිවිසි ප්‍රකට ව්‍යාපාරිකයකු වන අලිරාජා සුභාෂ්කරන්ගේ සුප්‍රසිද්ධ නිෂ්පාදන ආයතනයක් වන ලයිකා ප්‍රොඩක්ෂන්ස් (Lyca Productions) සුපිරි දමිළ නළු තලපති විජේගේ පුතු ජේසන් සංජේගේ ඉදිරි චිත්‍රපටයෙන් පසු ඉන්දියාවේ මෙහෙයුම් නතර කිරීමට නියමිත බවට වාර්තා පළ වෙනවා.
එම වාර්තා සත්‍ය නම් තලපති විජේගේ Kaththi චිත්‍රපටයෙන් ගමන ආරම්භ කළ ලයිකා සමාගම ඔවුන්ගේ මෙහෙයුම් අවසන් කරන්නේ විජේගේ පුතා අධ්‍යෂ්වරයකු ලෙස සිනමාවට පිවිසීමට නියමිත මෙහෙයුමකින් වීම දෛවෝපගතය.
කෙසේ වෙතත් මූල්‍යමය ගැටළු සම්බන්ධයෙන් පළ වන වාර්තා පිළිබඳව නිෂ්පාදන ආයතනය මේ තාක් කිසිදු අදහසක් දක්වා නැහැ.
මනි රත්නම්ගේ Ponniyin Selvan (PS-1 සහ PS-2), එස් ශංකර්ගේ 2.0, Indian 2 සහ Indian 3 ඇතුළු දෙමළ සිනමාවේ විශාලතම චිත්‍රපට කිහිපයකට මූල්‍යකරණය කිරීමේදී ලයිකා ප්‍රොඩක්ෂන්ස් ප්‍රධාන කාර්යභාරයක් ඉටු කරනු ලැබුවා. ඔවුන් Vada Chennai, Chekka Chivantha Vaanam, Kolamavu Kokila සහ Don වැනි කැපී පෙනෙන චිත්‍රපට කිහිපයකට මූල්‍ය සහාය ලබා දුන්නා.
2.0, Chandramukhi 2, Lal Salaam, Darbar, Kaappaan සහ Ram Setu වැනි නිර්මාණ කිහිපයක් නිසා ලයිකා ප්‍රොඩක්ෂන් උග්‍ර මූල්‍ය පාඩුවලට මුහුණ දෙමින් සිටීම මෙම තත්ත්වයට බලපා ඇති බවයි වාර්තා වන්නේ. මෑතකදී Indian 2, Vettaiyan සහ Vidaamuyarchi චිත්‍රපටවල අසාර්ථකත්වය ඔවුන්ගේ මූල්‍ය කටයුතු තවදුරටත් අඩාල කර තිබෙනවා.
එම පාඩුවලට අමතරව Lyca හි මව් සමාගම වන Lyca Mobile ප්‍රංශයේ සහ එක්සත් රාජධානියේ වැට් බදු සහ මුදල් විශුද්ධිකරණ නඩු ගණනාවක ද පැටලී සිටිනවා. මෙම නීතිමය ගැටළු දැඩි මූල්‍ය අස්ථාවරත්වයක් ඇති කර ඇති අතර එමඟින් නිෂ්පාදන ආයතනය නව චිත්‍රපට ආයෝජන නතර කිරීමට පෙළඹී ඇති බවයි වාර්තා වන්නේ.
මූල්‍යමය ආතතිය ප්‍රධාන ව්‍යාපෘතිවලින් අර්ධ වශයෙන්ද ඉවත් වී ඇති බව සඳහන්ය. ආශිර්වාද් සිනමාස් සමඟ ඇති වූ මූල්‍ය ආරවුලක් හේතුවෙන් Lyca සමාගම Mohanlal රංගනයෙන් දායක වන L2: Empuraan චිත්‍රපටයෙන් ඉවත් වූ බව ද වාර්තා වෙනවා.
පසු ගිය කාල සීමාවේ වාර්තා වූ ආකාරයට ලංකාවේ ඔවුන්ගේ පුවත්පතක්, රූපවාහිනී නාළිකාවක් ඇතුළු මාධ්‍ය ආයතන ගණනාවක්ද මේ වන විට පවත්වාගෙන යන්නේ දැඩි අසීරුතා මධ්‍යයේය. මේ දිනවල තිරගත වන අශෝක හඳගමගේ නිර්මාණයක් වන රාණි චිත්‍රපටය නිෂ්පාදනය කළේ ද ලයිකා ප්‍රොඩක්ෂන් සමාගම මඟිනි.
