පාකිස්තානය වෙනුවෙන් ඔත්තු බැලීම සහ සංවේදී ඉන්දීය හමුදා තොරතුරු පාකිස්තානයට ලබා දීම සම්බන්ධයෙන් ‘Travel With Jo’ සංචාරක යූ ටියුබ් නාලිකාවක් පවත්වාගෙන යන ජෝති මල්හෝත්‍රා නොහොත් ජෝති රාණි අත් අඩංගුවට පත්ව තිබෙනවා.
ඔත්තු බැලීමේ චෝදනාව යටතේ නඩු පවරා ඇති පුද්ගලයින් හය දෙනා අතර 33 හැවිරිදි ඇය ද සිටින බවයි ඉන්දීය මාධ්‍ය වාර්තා පෙන්වා දෙන්නේ.
ජෝති මල්හෝත්‍රා පාකිස්තාන මහ කොමසාරිස් කාර්යාලයේ නිලධාරී ඉෂාන් අර් රහීම් සමඟ සම්බන්ධ වී අවම වශයෙන් දෙවරක් පාකිස්තානයට ගොස් ඇති බව අනාවරණය වී ඇතැයි එම වාර්තාවල සඳහන්.
කාශ්මීර්, පහල්ගම් ත්‍රස්ත ප්‍රහාරයට ප්‍රතිචාර දැක්වූ ‘ඔපරේෂන් සින්දූර්’ වලින් පසුව, ඔත්තු බැලීම සහ ඉන්දීය හමුදාවේ සංවේදී තොරතුරු පිටකිරීමේ චෝදනාවට ඉෂාන් අර් රහීම් නීත්‍යානුකූල නොවන පුද්ගලයෙක් ලෙස ප්‍රකාශ කර පැය 24 ක් ඇතුළත ඉන්දියාවෙන් පිටව යන ලෙස දන්වා තිබුණා.
එමෙන්ම, පාකිස්තානයට ඉන්දීය හමුදා තොරතුරු ලබාදීමේ චෝදනාවට 25 හැවිරිදි ශිෂ්‍යාවක්, 24 හැවිරිදි ආරක්ෂක නිලධාරියෙක් ඇතුළු තවත් 5 දෙනෙක් අත්අඩංගුවට ගෙන ඇති බව වැඩිදුරටත් වාර්තා වෙනවා.
