කොළඹ මහ නගර සභාවේ අද (ජුනි 16) උදෑසන පැවති රහස් ඡන්දයකින් පසුව නගරාධිපතිවරිය ලෙස ව්‍රායි කැලී බර්තසාල් මීට සුළු මොහොතකට පෙර තේරී පත් වුණා.
ජාතික ජන බලවේගය නියෝජනය කරමින් ඉදිරිපත් වූ ව්‍රායි කැලී බර්තසාල් ඡන්ද 61ක් දිනා ගත් අතර, විපක්ෂය නියෝජනය කරමින් ඉදිරිපත් වූ රීසා සාරුක්ට ලබා ගැනීමට හැකිවූයේ ඡන්ද 54ක් පමණයි.
මැයි 6 වන දින පැවති පළාත් පාලන මැතිවරණයෙන් පසු අලුතින් තේරී පත් වූ කොළඹ මහ නගර සභාව අද උදෑසන එහි මංගල සැසිවාරය සඳහා රැස් වූ අතර පළමු සභා වාරය අද (16) පෙරවරු 9ට ආරම්භ වුණා.
එහිදී නගරාධිපතිවරයා සඳහා වන ජාතික ජන බලවේගය නියෝජනය කරමින්, ව්‍රායි කැලී බල්තසාර්ගේ නම යෝජනා වූ අතර විපක්ෂය නියෝජනය කරමින් රීසා සාරුක්ගේ නම යෝජනා වුණා.
ඒ අනුව නගරාධිපතිවරයා තෝරා ගැනීම සඳහා ඡන්ද විමසීමක් කොළඹ නාගරික කොමසාරිස්වරිය විසින් යෝජනා කළ අතර ඊට ජාතික ජන බලවේගය විසින් රහස්‍ය ඡන්දයක් සහ සමගි ජන බලවේගය විසින් විවෘත ඡන්දයක් යෝජනා කළා.
කෙසේ නමුත් පවත්වන ඡන්දය රහස්‍ය ඡන්දයක් ද විවෘත ඡන්දයක් යන්න සඳහා සභාව තුළ උණුසුම් තත්ත්වයක් මතුව තිබෙනවා.
ඒ අනුව, අවසානයේ සියලුම දෙනා ඒකමතිකව රහස්‍ය ඡන්දයක් පැවැත්වීමට එකඟතාවය පල කළා.
නගරාධිපතිවරයා තෝරා පත් කර ගැනීම සඳහා රහස් ඡන්දයක් පවත්වන පවත්වනු ලැබුවේ මැතිවරණයේදී කිසිදු පක්ෂයකට පූර්ණ බහුතරයක් නොලැබුණු බැවිනි.
