විපක්ෂ නායක සජිත් ප්‍රේමදාස මහතා එම ධුරයෙන් නෙරපා හැරීමේ රහසිගත මෙහෙයුමක් මේ වන විට ක්‍රියත්මක වෙමින් පවතින බව දේශපාලන ආරංචි මාර්ග පවසනවා.
සමගි ජන බලවේගය (SJB) දිගින් දිගටම මැතිවරණ පරාජය වී ඇති පසුබිමක සජිත් ප්‍රේමදාස මහතා විපක්ෂ නායකත්වයෙන් ඉවත් විය යුතු බවට මතයක් නිර්මාණය වීම මෙම තත්ත්වයට හේතුව බවයි වාර්තා වන්නේ.
එම තනතුර විපක්ෂයේ වඩාත් ප්‍රබල වෙනත් මන්ත්‍රීවරයෙකුට ලබා දිය යුතු බවට විපක්ෂ මන්ත්‍රීවරුන්, දේශපාලන විචාරකයන්, සමාජ මාධ්‍ය ක්‍රියාකාරීන් සහ බහුජන සංවිධාන යෝජනා ඉදිරිපත් කර ඇත්තේ ඒ අනුවයි.
ඔවුන් පෙන්වා දෙන්නේ වත්මන් නායකත්වය යටතේ විපක්ෂ නායකවරයකුගේ භූමිකාව නිසි ලෙස ඉටු නොවන බවයි.
බොහෝ කාලීන ගැටලුවලට නිසි ලෙස මුහුණ නොදී රජයට උපදෙස් දීම පමණක් සිදු වෙමින් පවතින අතර එය බරපතල ගැටලුකාරී තත්ත්වයක් බව පෙන්වා දෙනවා.
විපක්ෂයේ කාර්ය භාරය ඉටු කරන මන්ත්‍රීවරුන් ලෙස මේ වන විට මතු වී සිටින්නේ නාමල් රාජපක්ෂ සහ දයාසිරි ජයසේකර වැනි අයයි. ඔවුන්ගෙන් එක් අයෙකු විපක්ෂ නායකවරයාට පත් කළ යුතු බව බොහෝ පාර්ශ්වයන් යෝජනා කර තිබෙනවා.
මේ අතර, විපක්ෂ නායක ධුරය වෙනත් අයෙකුට ලබා දීමේ හැකියාව සහ ඒ සඳහා ඇති නෛතික පසුබිම පිළිබඳවද මේ දිනවල සොයා බැලීම් සිදුවන බව වැඩිදුරටත් වාර්තා වෙනවා.
සජිත් ප්‍රේමදාස මහතාගේ නායකත්වය යටතේ මේවන විට ජනාධිපතිවරණ දෙකක්, මහ මැතිවරණ තුනක් සහ පළාත් පාලන මැතිවරණයක් පරාජයට පත් වී ඇති බවයි ඔවුන් වැඩිදුරටත් පෙන්වා දෙන්නේ.
