නෙදර්ලන්තයේ ඇමස්ටර්ඩෑම් හි Schiphol ගුවන් තොටුපළේදී ක්‍රියාත්මක වන මගී ගුවන් යානා එන්ජිමක ගැටීමෙන් පුද්ගලයෙකු මිය ගොස් ඇති බව විදෙස් මාධ්‍ය වාර්තා පවසනවා.
ඩෙන්මාර්කය බලා පියාසර කිරීමට නියමිතව තිබූ KLM ගුවන් සේවයට අයත් Embraer ජෙට් යානයක එන්ජිමෙහි පුද්ගලයෙකු ගැටීමේ මෙම සිදුවීම සම්බන්ධයෙන් නෙදර්ලන්ත පොලිසිය මේ වන විටත් පරීක්ෂණ පවත්වනු ලබන බවයි සඳහන් වන්නේ.
මෙම සිද්ධිය හදිසි අනතුරක් ද නැතහොත් සියදිවි නසා ගැනීමක් ද යන්න නොදන්නා බව පොලිසියේ ප්‍රකාශකයෙකු රොයිටර් පුවත් සේවයට පවසා තිබෙනවා.
යානයේ සිටි සියලුම මගීන් සහ කාර්ය මණ්ඩලය ආරක්ෂිතව ඉවත් කර පරීක්ෂණ සිදු කරන බවයි පැවසෙන්නේ.
