ජාතික ජන බලවේගයේ මැයි දින රැළියට සහභාගී වීමට බලාපොරොත්තුවෙන් සිටින විශාල ජනකායකට ඊට අවස්ථාව සලසමින් මෙවර ජාතික ජන බලවේගයේ මැයි දින රැළි හතරක් රටම ආවරණය වන පරිදි තෝරා ගත් ප්‍රධාන දිස්ත්‍රික්ක හතරක දී පැවැත්වීමට කටයුතු සූදානම් කර ඇති බව ජාතික ජන බලවේගයේ ප්‍රධාන ලේකම් ටිල්වින් සිල්වා මහතා පවසනවා.
ඒ අනුව “රට හදන විසඳුමට-ජන බලය එක පෙළට” යන තේමාවෙන් ජාතික ජන බලවේගයේ මැයි රැළි යාපනය, අනුරාධපුරය, කොළඹ හා මාතර යන නගරවලදී පැවැත්වීමට නියමිතයි.
දැවැන්ත ජන බලයක් නිර්මාණය කර ගනිමින් රට බංකොලොත් කළ අගාධයට ගෙන ගිය දුෂ්ඨ පාලනය අවසන් කිරීම මැයි දිනයේ ප්‍රධානම අරමුණ බව ඒ මහතා සඳහන් කරනවා.
එම අරමුණ වෙනුවෙන් ඒකරාශී වීමට බලාගෙන සිටින මුළු රට පුරා පෙළ ගැසී සිටින ජනතාව කොළඹට ගෙන ඒම දුෂ්කර කාර්යයක් බවයි ටිල්වින් සිල්වා මහතා පවසන්නේ.
සෑම ක්ෂේත්‍රයක්ම පිරිහී ඇති සමාජයක යුක්ති ගරුක සාධාරණ මිනිසුන්ට බලා සිටීමට නොහැකි බැවින් වැඩ කරන ජනතාව ඇතුළු සියලු බලවේග මෙම ක්‍රමය වෙනස් කර ගැනීම සඳහා එක් වනු ඇතැයි සඳහන් කළ ලේකම්වරයා, මැයි දිනයේ සැබෑ අර්ථය කෙළසන ලද පාලක කණ්ඩායම්වලට මැයි දිනය කෙළෙසීමට තව දුරටත් ඉඩ නොතබමින් එක් වන ලෙස ද සඳහන් කළා.
