ගම්පහ ප්‍රධාන පාසලක ශිෂ්‍ය භට කණ්ඩායමක් පොලිස් විශේෂ කාර්ය බළකායේ නිල ඇඳුමට සමාන ඇඳුම් ඇඳ ටී 56 ගිනි අවි අතැතිව පෙළපාලියක (පෙරඩ්) පෙනී සිටිමේ සිදුවීම පිළිබඳව ගම්පහ මූලස්ථාන පොලිසිය විශේෂ විමර්ශනයක් ආරම්භ කර තිබෙනවා.
මෙම සිසුන් පොලිස් විශේෂ කාර්ය බළකායේ නිලධාරීන් භාවිතා කරන රෙදි වර්ගයම යොදාගෙන නිල ඇඳුම සකස් කර ඇති අතර මේ සම්බන්ධයෙන් මෙම නිල ඇඳුම් මැසූ අනුරාධපුරයේ රෙදි සාප්පුවක හිමිකරු පොලිසිය මගින් අත්අඩංගුවට ගෙන ඇති බවයි වාර්තා වෙන්නේ.
පොලිස් විශේෂ කාර්ය බළකායේ නිල ඇඳුම් සහිතව සිසුන් TikTok සමාජ මාධ්‍ය ජාලයේ පළ කළ වීඩියෝ පටවලට අනුව අදාළ විමර්ශන කටයුතු ආරම්භ කළ බව සඳහන්.
උසස් නිලධාරියෙක් මාධ්‍ය වෙත අදහස් දක්වමින් පවසා ඇත්තේ පාසල් ශිෂ්‍ය භටයින් සඳහා අනුමත කළ නිල ඇඳුම් කට්ටල දෙකක් නිර්දේශ කර තිබියදී හමුදාවක හෝ විශේෂ බළකායක නිල ඇඳුමක් පරිහරණයට අවසර දී නොමැති බවත් මෙය වැරදි පූර්වාදර්ශයක් බවත් ඊට වගකිවයුත්තන්ට එරෙහිව නීතිය ක්‍රියාත්මක වියයුතු බවයි.
ශිෂ්‍ය භටයින් සඳහා සරඹ පෙළපාලි හා පුහුණු කටයුතුවලදී පොයින්ට් 2.2 වර්ගයේ පතුරම්වලින් පමණක් වෙඩි තැබිය හැකි අර්ධ ස්වයංක්‍රීය වෙනම අවියක් නිකුත් කර ඇති අතර මෙම සිසුන් අත්වල ටී56 ගිනිඅවි රැගෙන සරඹ පෙළපාලියට සහභාගි වී සිටීම ගැටලුවක් බව ඔහු වැඩි දුරටත් පැවසුවා.
එමෙන්ම ස්වයංක්‍රීය ගිනි අවියක් ලබාදිය යුත්තේ පූර්ණ සංග්‍රාමික පුහුණුව ලත් ආරක්ෂක අංශයේ නිලධාරියෙකුට බවත් එම අවි පාසල් සිසුන්ට ලබාදුන්නේ කාගේ වුවමනාවකටද යන්න විමසා බැලිය යුතු බවත් මේ සම්බන්ධයෙන් වැඩි දුරටත් අදහස් දක්වමින් අදාළ නිලධාරියා පවසා ඇත්තේ.
