විදෙස් සිසුන් නිසා ඔස්ට්‍රේලියාවේ කුලී නිවාස අර්බුදයක්..

ඔස්ට්‍රේලියාවේ නිවාස කුළී ගාස්තු ඉහළ ගොස් එම වෙළඳපොල තුළ දැඩි අර්බුදයක් ඇතිවීමට හේතුව ප්‍රමාණය ඉක්මවා විදෙස් සිසුන් ගෙන්වා ගැනීම බවට ස්වාධීන ආයතනයක් චෝදනා කරනවා.

මෙතෙක් වසරකට පැමිණි විදෙස් සිසුන් සංඛ්‍යාව 122,000 ක් වැනි අගයක පැවති නමුත් පසුගිය වසරේදී 250,000 ඉක්මවූ සිසුන් පිරිසක් ඕස්ට්‍රේලියාවට පැමිණ ඇති බව සංඛ්‍යා ලේඛණවල දැක්වේ. මහජන කටයුතු පිළිබඳ ආයතනයට (IPA) අනුව, 2022-23 මූල්‍ය වර්ෂය තුළ නව නිවාස ඒකකවලින් 70‍% ක් ජාත්‍යන්තර සිසුන් විසින් අත්පත් කරගෙන ඇති අතර, අලුතින් පැමිණි අනෙකුත් සංක්‍රමණික ප්‍රජාවට ඉතිරි වන්නේ 30‍%ක් පමණි.

පසුගිය මාස 18 තුළ කුලී නිවාස වෙලඳපොල වඩ වඩාත් දැඩි වෙමින් පැවතියද, මෙම මූල්‍ය වර්ෂයේදී තවත් නව ජාත්‍යන්තර සිසුන් 187,000ක් ගෙන්වා ගැනීමට රජය අපේක්ෂා කරන බව IPA අධ්‍යයනය පවසයි.

ඔවුන් නවාතැන් ගන්නේ කොහේද යන්න හෝ මාර්ග සහ පොදු ප්‍රවාහනය වැනි යටිතල පහසුකම් සපයන්නේ කෙසේද යන්න රජයට පැහැදිලි සැලැස්මක් ද නොමැති බව කියා සිටියි.

මෑත මූල්‍ය වර්ෂය තුළ 400,000 කට වැඩි නව සංක්‍රමණිකයන්ගෙන් තුනෙන් දෙකක් පමණ ශිෂ්‍ය වීසා මත ඕස්ට්‍රේලියාවට පැමිණ ඇති බව වාර්තාව පවසයි. මේ වසරේ ජනවාරි සිට අප්‍රේල් දක්වා කාලය තුළ ජාත්‍යන්තර සිසුන් 590,566ක් බඳවාගෙන ඇත.

චීනයේ සහ ඉන්දියාවේ සිසුන් ඕස්ට්‍රේලියාවේ සියලුම ජාත්‍යන්තර සිසුන්ගෙන් 40‍% ක් පමණ වේ. The Australian හි වාර්තා කර ඇති පරිදි, ඕස්ට්‍රේලියාවේ අධ්‍යාපනය ලැබීමට අනුමත කරන ලද ජාත්‍යන්තර සිසුන් සංඛ්‍යාව වසර දහයක ඉහළම මට්ටමට පැමිණ ඇති අතර, වීසා 500,000 කට වඩා නිකුත් කර ඇති අතර මෙම නව පැමිණීම් නිවාස අර්බුදය උග්‍ර කරනු ඇත.

ස්වදේශ කටයුතු දෙපාර්තමේන්තුවේ දත්ත අධ්‍යයනයකට අනුව, අග‍්‍රාමාත්‍ය ඇල්බේනියානුගේ රජය පසුගිය මූල්‍ය වර්ෂයේදී ශිෂ්‍ය වීසා 520,911ක් නිකුත් කර ඇති අතර එය පසුගිය රජයේ ඉහළම වාර්ෂික අගයට වඩා 115,000ක් වැඩිය.

ඒ අනුව, 2023 සහ 2028 අතර ඔස්ට්‍රේලියාව නිවාස 252,000කට අධික ප්‍රමාණයක නිවාස සැපයුම් හිඟයකට මුහුණ දීමට නියමිත බව ජූනි මාසයේ IPA පර්යේෂණය අනතුරු අගවා සිටින්නේය.

මූලාශ‍්‍ර – macrobusiness.com.au & 9news.com.au