හැරී පොටර් චිත්‍රපට මාලාවේ බහුතරයක ඇල්බස් ඩම්බල්ඩෝර්ගේ චරිතයට පණ පෙවූ ප්‍රකට නළු මයිකල් ගැම්බන් නියුමෝනියාව නිසා ඇති වූ සංකූලතා හේතුවෙන් වයස අවුරුදු 82 දී අභාවප්‍රාප්ත වී තිබෙනවා.
ඔහුගේ ප්‍රචාරක ක්ලෙයාර් ඩොබ්ස් විසින් ඔහුගේ පවුල වෙනුවෙන් ප්‍රකාශයක් නිකුත් කරමින් මේ බව දැනුම් දෙනු ලැබුවා.
ශ්‍රීමත් මයිකල් ගැම්බන්ගේ වියෝව පිළිබඳ පවුලේ බලවත් ශෝකය එමඟින් ප්‍රකාශ කළ අතර, ඔහු ආදරණීය ස්වාමිපුරුෂයෙකු සහ පියෙකු ලෙස විස්තර කර තිබෙනවා.
මයිකල් ගැම්බන් රූපවාහිනිය, චිත්‍රපටය සහ ගුවන්විදුලිය හරහා පුළුල් වැඩ කොටසක් ඉටු කළ කලාකරුවෙක් ලෙස සැලකෙනවා. ඔහුගේ අනෙකුත් ප්‍රමුඛ භූමිකාවන්ගෙන් එකක් වූයේ 1980 දශකයේ ජනප්‍රිය වූ “The Singing Detective” කතා මාලාවේ සමේ රෝගයට ගොදුරු වූ රහස් පරීක්ෂකවරයාගේ භූමිකාවයි.
රංගන ලෝකයේ ඔහුගේ පරම්පරාවේ ප්‍රමුඛ චරිතයක් වන මයිකල් ගැම්බන් උපත ලැබුවේ ඩබ්ලින්හි කබ්රා හි නමුත් ඔහුගේ ළමා කාලය තුළ ලන්ඩනයට සංක්‍රමණය වූ බව සඳහන්.
කැම්ඩන් හි අයර්ලන්ත සංක්‍රමණික ප්‍රජාවක හැදී වැඩුණු ඔහු මුලින් මෙවලම් සාදන්නෙකු ලෙස සේවය ආරම්භ කර තිබුණා. පෞරාණික ගිනි අවි, ඔරලෝසු සහ සම්භාව්‍ය මෝටර් රථ එකතු කිරීම සඳහා ඔහු ජීවිත කාලය පුරාම ආශාවක් දැක්වූ බව සඳහන්.
ඔහුගේ එකතු කිරීමේ ආශාව ගැන ආවර්ජනය කරමින්, ඔහු වරක් සම්මුඛ සාකච්ඡාවකදී සඳහන් කළේ, “මම හැම විටම උමතු දේවල් එකතු කරන්නෙකු වීමි. Richard Briers මුද්දර එකතු කරයි. මම කාර් සහ තුවක්කු එකතු කරනවා, ඒවා මිලෙන් වැඩියි. ගබඩා කරන්න අමාරුයි.”
ආධුනික මෙවලම් සාදන්නෙකු ලෙස සේවය කරන අතරතුර, ගැම්බන් රාජකීය නාට්‍ය කලා ඇකඩමියේ රංගන අධ්‍යයනය ද හදාරනු ලැබුවා.
මයිකල් ගැම්බන්ගේ උරුමය තහවුරු වුණේ “හැරී පොටර්” චිත්‍රපට මාලාවේ හොග්වාර්ට්ස් හි ගෞරවනීය ප්‍රධාන ගුරුවරයා වන ඇල්බස් ඩම්බල්ඩෝර්ගේ චරිතය ඔහු විසින් නිරූපණය කිරීමෙනි.
2002 දී රිචඩ් හැරිස්ගේ අභාවයෙන් පසුව ඔහු එම භූමිකාව භාරගත් අතර “හැරී පොටර්” චිත්‍රපට අටෙන් හයක ඩම්බල්ඩෝර් ලෙස පෙනී සිටියේ ඔහුයි. මයිකල් ගැම්බන්ගේ අභාවය යුගයක අවසානය සනිටුහන් කරන්නක් ලෙසයි සැලකෙන්නේ.
