සාරාංශය:
ශ්‍රී ලාංකික රංගන ශිල්පිනී මිෂෙල් දිල්හාරා, ආර්මේනියාවේ පැවති එක්සත් ජාතීන්ගේ COP17 ජෛව විවිධත්ව සමුළුවේදී පරිසරය රැකගැනීම වෙනුවෙන් කළ කතාවක් ජාත්‍යන්තර අවධානයට ලක්ව තිබෙනවා. විශේෂයෙන්ම “We Need Heroes, Not Followers” යන ඇගේ පණිවිඩය සමාජ මාධ්‍ය ඔස්සේ විශාල ප්‍රචාරයක් ලබාගෙන ඇති බව වාර්තා වනවා.
Summary:
Sri Lankan actress Michelle Dilhara has attracted international attention for her speech at the United Nations COP17 Biodiversity Conference in Armenia. Her message, “We Need Heroes, Not Followers,” calls for greater action to protect the planet and biodiversity.
අනුගාමිකයන් වෙලා බලාගෙන ඉන්න එපා, පරිසරය වෙනුවෙන් ඉදිරියට එන වීරයන් වෙන්න! ශ්‍රී ලාංකික රංගන ශිල්පිනී මිෂෙල් දිල්හාරා ජාත්‍යන්තර වේදිකාවකදී ලබාදුන් මේ පණිවිඩය මේ වනවිට විශේෂ අවධානයක් දිනාගෙන තිබෙනවා. 🇱🇰
(Lakvahini) – මේ කතාව ඇසෙන්නේ ආර්මේනියාවේ Yerevan නුවර පැවති එක්සත් ජාතීන්ගේ COP17 ජෛව විවිධත්ව සමුළුවෙන්.
ශ්‍රී ලාංකික රංගන ශිල්පිනියක, ලේඛිකාවක සහ පරිසර ක්‍රියාකාරිනියක වන මිෂෙල් දිල්හාරා එහිදී පෘථිවිය සහ ජෛව විවිධත්වය ආරක්ෂා කිරීමේ වැදගත්කම පිළිබඳව අදහස් ඉදිරිපත් කර තිබෙනවා.
ඇගේ කතාවේ ප්‍රධාන පණිවිඩය වුණේ “We Need Heroes, Not Followers” යන්නයි. ඒ කියන්නේ අනුන් කරන දේ බලාගෙන සිටින පිරිසක් නොව, පරිසරය ආරක්ෂා කිරීම වෙනුවෙන් ක්‍රියාත්මක වන පරම්පරාවක් බවට අප පත්විය යුතු බවයි.
ඇය සිය කතාවේදී පෘථිවියේ පවතින අභියෝග කිහිපයක් ගැනත් අවධානය යොමු කළා. වනාන්තර විනාශ වීම, සාගර පරිසරයට සිදුවන හානි සහ වසර මිලියන ගණනක් පැවති ජීවී විශේෂ පවා වඳවී යාමේ තර්ජනයට මුහුණ දීම ඒ අතරට ඇතුළත්.
නමුත් ඇගේ කතාවේ වඩාත් වැදගත් පණිවිඩය වුණේ අනාගත පරම්පරාව අපව මතක තබාගත යුත්තේ අප ගොඩනැඟූ ධනය හෝ බලය නිසා පමණක් නොව, වඳවීමේ තර්ජයට එරෙහිව අප ගත් ක්‍රියාමාර්ග නිසා බවයි.
ඒ අතරේ, මෙම කතාව සමාජ මාධ්‍ය තුළත් විශේෂ අවධානයක් දිනාගෙන ඇති බව Newsblaze වාර්තාව සඳහන් කරනවා.
එම වාර්තාවට අනුව, කතාවට අදාළව Shares 296,000ක්, Reactions 686,327ක් සහ Comments 51,000කට අධික ප්‍රමාණයක් වාර්තා වී තිබෙනවා. එමෙන්ම රටවල් 75කට වැඩි සංඛ්‍යාවක ප්‍රේක්ෂකයන් අතරට මෙම පණිවිඩය ළඟා වී ඇති බවත් සඳහන්.
මිෂෙල් දිල්හාරා මීට පෙර රංගන ක්ෂේත්‍රයෙන් පමණක් නොව ලේඛිකාවක සහ පරිසර ක්‍රියාකාරිනියක ලෙසත් කටයුතු කර තිබෙනවා. ඇය Social Invisibility Is Not a Fiction, It Exists කෘතියේ කතුවරිය වන අතර, ශ්‍රී ලංකාවේ Earth Day Network හි හිටපු තානාපතිනියක් ලෙසත් කටයුතු කර තිබෙනවා.
ශ්‍රී ලාංකික කලා ශිල්පිනියකගේ හඬ ජාත්‍යන්තර පරිසර වේදිකාවකින් ඇසීමත්, එහිදී ඉදිරිපත් කළ පණිවිඩය පරිසර සංරක්ෂණය පිළිබඳව අවධානය යොමු කිරීමත් මෙහි විශේෂත්වයයි.
අනුගාමිකයන් නොව, වෙනසක් ඇති කරන වීරයන් වීමයි ඇය ලෝකයට දුන් පණිවිඩය.
#MichelleDilhara #COP17 #Biodiversity #SriLanka
