නුවරඑළිය මහ නගර සභාවේ මහ නගාරාධිපතිවරයා නව නිල රථයක් සහ නිල නිවසක් ලබා ගැනීම සඳහා යෝජනාවක් සම්මත කරගෙන තිබෙනවා.
මේ අනුව 2026 නුවරඑළිය මහ නගර සභාවේ වාර්තාවට එය ඉදිරිපත් කිරීමට නියමිත අතර විපක්ෂය නියෝජනය කරන එක්සත් ජාතික පක්ෂය සහ ස්වාධීන කණ්ඩායම්වල නියෝජිතයන් විරෝධය එල්ල කර තිබෙනවා.
“පාර්ලිමේන්තු මන්ත්‍රීවරුන් ඡන්දය ඉල්ලද්දි වාහන එපා කියලා ඇවිල්ලා දැන් රථ ගාය හැදිලා වගේ නිල නිවාස එපා කියලා ඇවිත් දැන් නිල නිවාස ඉල්ලනවා වගේ නුවරඑළිය නගරාධිපතිවරයාට රථ ගාය සහ නිල නිවාස මේනියාව ඇති වී මහජනතාවගේ බදු මුදල් අවභාවිතා කිරීමට සූදානම් වෙනවා” යැයි නුවරඑළිය මහ නගර සභාවේ විපක්ෂය නියෝජනය කරන එක්සත් ජාතික පක්ෂයේ කණ්ඩායම් නායක නාගරික මන්ත්‍රී සුසන්ත ප්‍රියලාල් පලිහවඩන මහතා සහ ස්වාධීන කණ්ඩායම නියෝජනය කරන නාගරික මන්ත්‍රී පූජ්‍ය මාකඳුරේ රතන වංශ හිමි මාධ්‍ය වෙත අදහස් දක්වමින් පවසා තිබෙනවා.
විරෝධය පළ කරමින් ඔවුන් පෙන්වා දෙන්නේ පසුගිය මාසික සභා වාර වලදී නගරාධිපතිවරයා දැනට භාවිතා කරන නිල රථය වෙනුවට සැප පහසු නිල රථයක් ලබා ගැනීම සදහා ජාතික ජනබල වේගය නියෝජනය කරන නාගරික මන්ත්‍රී ආර්.වසීහරන්ගේ යෝජනාව සහ නගරාධිපතිවරයාට සියලු පහසුකම් සහිත සුඛෝපභෝගී නිල නිවාසයක් ලබා ගැනීම වෙනුවෙන් යෝජනාව 2025.11.14 දින පැවැති මාසික මහ සභාවේදී සභා සම්මත වී ඇති බවයි.
නුවරඑළිය මහ නගර සභාවේ එක්සත් ජාතික පක්ෂ කණ්ඩායම් නායක නාගරික මන්ත්‍රී සුසන්ත ප්‍රියලාල් පලිහවඩන සහ ස්වාධින කණ්ඩායම නියෝජනය කරන නාගරික මන්ත්‍රී මාකදුරේ රතන වංශ හිමියන් වැඩිදුරටත් මෙසේ අදහස් දක්වා තිබෙනවා.
“2025.11.14 දින නුවරඑළිය මහ නගර සභාවේ මාසික මහ සභාවේදී නගරාධිපතිවරයාට අලුත් නිල රථයක් සහ නගරාධිපති නිවසක් ඉදිකිරීමේ මෙම යෝජනාවන් දෙක ඉදිරිපත් කරන අවස්ථාවේදී ද අපගේ විරෝධය අපි ප්‍රකාශ කළා.
මේ පත්වෙලා ඉන්න නුවරඑළිය මහ නගර සභාවේ නගරාධිපති උපාලි වනිගසේකර මහතා නුවරඑළිය මහ නගර සභාවේ 19 වෙනි නගරාධිපතිවරයා.
මෙතෙක් කල් හිටපු නගරාධිපතිවරුන් කිසිම කෙනෙක් තමන්ගේ සුඛ විහරණය සඳහා මෙතරම් මුදල් කන්දරාවක් යට කරන යෝජනා ඉදිරිපත් කරලා නැහැ.
මේ වන තෙක් එක් නගරාධිපතිවරයෙකු වත් නිල නිවසක් අවශ්‍යයි කියල ඉල්ලලා නෑ මොකද මේකේ නගරාධිපතිකම් කරන්න ආවෙ පිට මිනිස්සු නෙවෙයි නුවරඑළියෙම පයින් එන දුර දුරක පදිංචි වෙලා ඉන්න අය.
වර්තමාන නගරාධිපතිවරයාටත් පයින් එන දුරක තමයි නිවස පිහිටලා තියෙන්නේ.
තවද මෙම නිල නිවාස ඉදිකිරීමට යෝජනා කරන්නේ නුවරඑළියේ වාණිජ වටිනාකම් වලින් වැඩි පර්චසයක් රුපියල් කෝටියටත් වැඩි මුදලකට ඉල්ලුම තියෙන ස්ථාන වල ,
නගරාධිපතිවරයාට සිය සුඛ විහරණය සඳහා නිල නිවසක් ලබා ගැනීම වෙනුවෙන් ආණ්ඩු පක්ෂය හා ආණ්ඩු පක්ෂයට සහය දෙන කම්කරු කොංග්‍රසයේ මන්ත්‍රීවරුන් ඉල්ලීමක් වශයෙන් සිදු කරන්නේ නගරාධිපතිවරයා හමුවීමට පැමිණෙන අමුත්තන්ට සැලකීම සඳහා නිල නිවසක් අත්‍යවශ්‍ය බවයි.
ඒ හැම දේකටම සරිලන පරිදි තමයි හිටපු නගරාධිප්‍තිවරුන් වන චන්දන ලාල් කරුණාරත්න මහතාගේ සහ මහින්ද දොඩම්පිකමකින් මහතාගේ කාලය තුළදී සියලු පහසුකම් සහිත නව නගර සභා ගොඩනැගිල්ල ඉදිකරලා තියෙන්නේ ඒකෙ ඔය කියන හැම සැකිල්ලක්ම සත්කාරයක්ම කරන්න පුළුවන් නීතියට පටහැනි නොවන .
ජනාධිපති නිල නිවස් ද පොදු කටයුතු සඳහා වෙන් කිරීමේදී නුවරඑළිය ජනාධිපති නිල නිවසත් පොදු කටයුත්තකට වෙන් වෙයි කියලා අපි විශ්වාස කරනවා වත්මන් ජනාධිපතිවරයා දුන්න මැතිවරණ පොරොන්දුවල විදිහට.
එවන් පසුබිමක නුවරඑළිය වැනි සංචාරක නගරයක අධි වටිනාකමකින් යුතු තැනක නගරාධිපතිවරයාට නිල නිවාසයක් කිසිසේත් අවශ්‍ය නොවන කාරණාවක් හැටියටයි අපි දකින්නේ ,
ඒත් එක්කම නිල රථය ගැන සඳහන් කරනවානම් වර්තමාන නගරාධිපතිවරයාගේ නිල රථය එතරම් පරණ එකක් නෙමෙයි එය සාමාන්‍ය රාජකාරී වලට භාවිතා කිරීම සඳහා ඇති නිල රථය.
එයට අමතරව විශේෂ අවස්ථා සඳහා භාවිතා කිරීමට සුඛෝපභෝගී කැබ් රථයක් සහ අධි සුඛෝපභෝගී වෑන් රථයක් ද නුවරඑළිය මහ නගර සභාව සතුව තිබෙන විට මහජනතාවගේ බදු මුදලින් රුපියල් මිලියන 25ක් කැබ රතයක් මිලදී ගැනීම වෙනුවෙන් වෙන් කිරීම මහජන මුදල් අවභාවිතාවක් හැටියටයි අප දකින්නේ.
හිටපු නගරාධිපති මහින්ද දොඩම්පේ ගමගේ මහතා ගැන විශේෂයෙන් සඳහන් කරන විට ඔහු නගරාධිපති නිල රථය කිසිම හේතුවක් මත භාවිතා කරලා නැහැ ඔහු රාජකාරී කටයුතුවලදීත් භාවිතා කළේ ඔහුගේ පෞද්ගලික රථය පමණයි.
අඩුම තරමේ පෞද්ගලික රථයට ඉන්ධනවත් ලබා ගත්තේ නැහැ ඔහු ඉන්ධන සඳහා වැය කරපු මුදල සහ ඔහුගේ සම්පූර්ණ මාසික දීමනාවද පාසල් ළමුන්ගේ අධ්‍යාපන කටයුතු සඳහා ශිෂ්‍යාධාර පිරිනිවීමට වියදම් කරා.
එවන් අගය කළ යුතු ක්‍රියාවන් සිදුකළ නගරාධිපතිවරු පාලනය කල නුවරඑළිය මහ නගර සභාවේ නව නගරාධිපති උපාලි වනිගසේකර මහතාට මේ හැදිලා තියෙන්නෙ පාර්ලිමේන්තු මන්ත්‍රීවරුන්ට හැදිලා තියෙන රථ ගාය සහ නිල නිවාස මේනියාව කියලයි අපි දකින්නේ.
අපිට මතකයි බලයට එන්න කලින් වත්මන් ජනාධිපතිවරයා කියනවා පාර්ලිමේන්තුවට අලුතින් පත්වන මන්ත්‍රීවරුන්ට තවත් එයට කලින් හිටපු මන්ත්‍රී කෙනෙකු පස්ස තිබ්බ වාහන භාවිතා කරන්න බැරි මානසික ලෙඩක් තියෙනවා ,
අපි බස් එකේ හරි කෝච්චිය හරි ගිහිල්ලා මහජන සේවය කරනවා. මහජනතාවට නොලැබෙන වරප්‍රසාද කිසිවක් අපිට එපා කියලා. අපිට ටිකක් කල්පනා කරලා බලන්න කියලත් ඒ කාලේ කිව්වා. ඒ ජනාධිපතිවරයාගේම පාලන සමයේ පත්වෙච්ච ඔහු යටතේම දේශපාලනය කරන පාර්ලිමේන්තු මන්ත්‍රීවරුන්ට ඔහු මුදල් අමාත්‍යවරයා වශයෙන් අළුත් වාහන ගේන්න අයවැයේදී පාර්ලිමේන්තුවට යෝජනා කරනවා
ඒ වගේම තමයි නිල නිවාස අපි ගන්නේ නෑ ඒවා පොදු කටයුතු වලට වෙන් කරනවා කිව්වා ඒත් දැන් නිල නිවාස වලට පොර කනවා පාර්ලිමේන්තු මන්ත්‍රීවරුන්.
පාර්ලිමේන්තු මන්ත්‍රීවරුන්ට තියෙන ඒ ලෙඩේම නුවරඑළිය නගරාධිපතිවරයාටත් බෝවෙලා මහජන බදු මුදලින් අති විශාල මුදලක් කන්දරාවක් තනි පුද්ගලයෙකුලෙස තමන්ගේ සුඛ විහරණය වෙනුවෙන් වෙන් කරවා ගැනීමට එරෙහිව විපක්ෂයක් හැටියට අපි විරුද්ධ වෙනවා වගේම එම ක්‍රියාව තරය හෙලා දකිනවා.
නගරාධිපතිවරයාගේ මේ ඉල්ලීම් දෙකට යන වියදම ගැන සලකා බලන විට නිල රථයට මිලියන 25ක් වියදම් කරන්න කියලා ඉල්ලීමක් කරලා තියෙනවා ,
ඒත් එක්කම නිල නිවාසය හදන්න යෝජනා කරන බිම් කොටස් කීපයේ වාණිජ වටිනාකම රුපියල් කෝටියක් (මිලියන 10ක්) බැගින් ගත්තත් පර්චස් දහයක ඉඩම් කොටසක නිල නිවස හදනවානම් එයින් මහ නගර සභාවට ඇතිවන පාඩුව කෝටි දහයක් (මිලියන 100ක්) ඔය කියන විදිහේ සැප පහසුකම් එක්ක නිවස හදන්න අඩුම රුපියල් කෝටියක් (රුපියල් මිලියන 10ක්) වැය උනා කියන්නේ සමස්ත වශයෙන් කෝටි 11ක් මිලියන 110 ක් නිල නිවසට විතරක් වියදම් වෙනවා ,
එවිට ඔය යෝජනා දෙක ක්‍රියාත්මක කරන්න රුපියල් කෝටි 13.5ක් එහෙමත් නැත්නම් මිලියන 135 ක් වියදම් කරන්න වෙනවා.
මොන පිස්සුවකටද තනි පුද්ගලයෙකුගේ සුඛ විහරණයට මෙච්චර වියදම් මහ ජනතාවගේ බදුල් මුදල්වලින් කරන්න යන්නේ.
නුවරඑළිය නගරයේ සංවර්ධන කටයුතු රැසක් ඉතිරිව තිබෙනවා කරන්න.
කසල කළමනාකරණ ගැටලුව නාගරික සංවර්ධන කටයුතු හා සතිපොළ සංවර්ධන කටයුතු ජල ගැටලු විසඳීම වැනි මහජනතාවට ප්‍රයෝජනවත් දේවල් සියල්ල පසෙක තබා මහජන බදු මුදලින් නගරාධිපති සැප විඳින්න යන එකට අපි තරයේ විරුද්ධයි එයට විරුද්ධව පාරට බසින්න වුනත් අපි ලෑස්තියි
අපේ විරෝධතාවය අපි මෙලෙස ප්‍රකාශ කරත් මෙම යෝජනා ඇතුළත් 2026 නව අයවැය සභා සම්මත කර ගනී කියලත් අපි හිතනවා”
