ළමයින්ගේ ආරක්ෂාව සඳහා දැඩි ලෙස සැලකිලිමත්වන රටවල් ලැයිස්තුවට එක් වෙමින් මැලේසියාව ලබන වසරේ සිට වයස අවුරුදු 16 ට අඩු ළමුන් සඳහා සමාජ මාධ්‍ය භාවිතය තහනම් කිරීමට තීරණය කර තිබෙනවා.
ඒ අනුව ඕස්ට්‍රේලියාවේ සහ අනෙකුත් රටවල සමාජ මාධ්‍ය භාවිතය සඳහා වයස් සීමාවන් පැනවීමට භාවිතා කරන යාන්ත්‍රණයන් සමාලෝචනය කිරීමට රජය පියවර ගනිමින් සිටින බවයි වාර්තා වන්නේ.
සයිබර් හිරිහැර කිරීම, මූල්‍ය වංචා සහ ළමා ලිංගික අපයෝජන වැනි මාර්ගගත හානිවලින් දරුවන් ආරක්ෂා කර ගැනීම මෙහි අරමුණ වෙනවා.
ලිංගික අපයෝජකයන්ගෙන් දරුවන් ආරක්ෂා කිරීම ඇතුළුව සයිබර් අපරාධ මැඩපැවැත්වීම සඳහා ගනු ලැබූ කැබිනට් තීරණයක් මත මෙම තහනම පදනම් වී ඇති බවයි වාර්තා වන්නේ.
පාසල් දරුවන් අතර සයිබර් හිරිහැර කිරීම්, ලිංගික හිරිහැර සහ විනය ගැටලු ඉහළ යාම පිළිබඳ කණස්සල්ල ද මෙම තහනමට හේතු වෙන බව එරට බලධාරින් පෙන්වා දී තිබෙනවා.
මේ අනුව අවුරුදු 16ට අඩු දරුවන්ට සමාජ මාධ්‍ය ගිණුම් විවෘත කිරීමට නොහැකි වන ලෙස ලියාපදිංචි කිරීම් විධිමත් කිරීමට ද මැලේසියානු රජය පියවර ගනිමින් සිටින බවයි වැඩිදුරටත් වාර්තා වන්නේ.
