පූජ්ය බලංගොඩ කස්සප හිමියන්ට ලබන දෙසැම්බර් 10 දිනට පෙර අධිකරණය හමුවේ පෙනී සිටින ලෙස ත්රිකුණාමලය මහේස්ත්රාත් එම්.එන්.එම් සන්සුදීන් මහතා’ නොසිති නිකුත් කර තිබෙනවා.
ඒ ත්රිකුණාමලය,කොටුව පාරේ පිහිටි ශ්රී සම්බුද්ධ ජයන්ති විහාරයට අයත් ඉඩමක බුදු පිළිමයක් තැන්පත් කිරීමට යෑමේදී ඇති වූ සිද්ධියට අදාළවයි. පූජ්ය බලංගොඩ කස්සප හිමියන් එම සිදුවීමට අදාළව පොලිසියට ප්රකාශයක් ලබාදීම ප්රතික්ෂේප කර තිබුණා.
ත්රිකුණාමල වරාය පොලිස් ස්ථානාධිපති ප්රධාන පොලිස් පරීක්ෂක කේ.ඩබ්.ජි.එස්.කේ.සමරසිංහ මහතා බී-වාර්තාව ඉදිරිපත් කරමින් කියා සිටියේ ඉකුත් 16 වන දින ඇති වූ මෙම සිද්ධිය සම්බන්ධයෙන් රෝහල් ගතවී සිටි පූජ්ය බලංගොඩ කස්සප හිමිගෙන් වෛද්ය අනුමැතිය මත ප්රකාශයක් සටහන් කර ගැනීමට යෑමේදී ප්රකාශයක් ලබාදීම ප්රතික්ෂේප කිරීම ලංකා දණ්ඩ නීති සංග්රහයේ 184 වගන්ති ප්රකාරව දඬුවම් ලැබිය හැකි වරදක් බවයි.
විමර්ශන වලට අදාලව සහාය දැක්වීම සියලු පුරවැසියන්ගේ යුතුකමක් බවත් රටේ සංහිඳියාව බිඳ වැටිය හැකි සිදුවීමක් වන මෙම සිදුවීමේ විමර්ශනවලට සහාය නොදක්වන හිමිනමට අධිකරණයේ පෙනී සිටින ලෙස නොසිති නිකුත් කරන ලෙස අදාළ බී වාර්තාවෙන් පොලිසීය ඉල්ලා තිබෙනවා.
දැනට උන්වහන්සේ වැඩ වාසය කරන ස්ථානයක් සොයා ගැනීමට නොහැකි නිසා වැඩ වාසය කරන ස්ථානය සොයා ගැනීමටත් ජාතික හැඳුනුම්පත් අංකය හා ලිපිනය තහවුරු කර ගැනීම සඳහාත් උන්වහන්සේ භාවිතා කරන ජංගම දුරකථන අංකයට දුරකථන විශ්ලේෂණ වාර්තාවක් ලබා දෙන ලෙස අදාල දුරකථන සමාගමේ කළමනාකරුට නියෝගයක් නිකුත් කරන ලෙසද පොලිසිය ඉල්ලීමක් කරනු ලැබුවා.
