(Lakvahini) – ටීවී දෙරණ නාලිකාවේ විකාශය වන “හුස්මක් ළඟින්” ටෙලි නාට්යයේ ‘දැහැමි’ ගේ චරිතය හරහා ප්රේක්ෂක ආකර්ෂණය දිනාගත් නැඟී එන රංගන ශිල්පිනී අමාෂා දිල්රංගා පවසන්නේ රංගනය යනු කෙළවරක් නොමැති, ජීවිත කාලය පුරාම හැදෑරිය යුතු කලාවක් බවයි. ක්ෂේත්රයට පිවිසෙන නවකයන්ට මුලදීම ප්රධාන චරිත ලැබීමේ ප්රවණතාව අඩු වුවද, ලැබෙන සුළු හෝ අවස්ථාව උපරිමයෙන් ප්රයෝජනයට ගැනීම ඉදිරි ගමනට මාවත සකසන බව ඇය අවධාරණය කරයි.
සිනමා සංස්ථාව අසලදී වෙනස් වූ ජීවන මඟ..
බදුල්ල විහාරමහාදේවි බාලිකා විද්යාලයෙන් මූලික අධ්යාපනය ලබා, බදුල්ල මධ්ය මහා විද්යාලයෙන් උසස් පෙළ හැදෑරූ අමාෂා, පාසල් සමයේදී රංගනය කෙරෙහි විශේෂ උනන්දුවක් දක්වා නොමැත. එහෙත්, ප්රකට ඉන්දීය නිළි ජෙනිෆර් වින්ගට්ගේ (Jennifer Winget) රංගන විලාසය කෙරෙහි ඇති වූ ආසාව ඇයව රංගන ක්ෂේත්රය දෙසට යොමු කිරීමට මුල් පදනම දමා ඇත.
ඇය ක්ෂේත්රයට පිවිසීම අහඹු සිදුවීමකි. කොළඹ සංචාරයකින් පසු නැවත බදුල්ල බලා යන අතරතුර ජාතික චිත්රපට සංස්ථාව නැරඹීමට ගිය අවස්ථාවක, එහි පැවැති ඔඩිෂන් (Screen Test) පෝලිමකට එක්වීමට ඇයට අවස්ථාව ලැබී ඇත. එය හර්ෂ උඩකන්ද අධ්යක්ෂණය කළ “රෝස ආදරේ” චිත්රපටයේ ඔඩිෂන් එකක් වූ අතර, ඉන් මාස දෙකකට පසු ඇයට එහි උප-චරිතයක් සඳහා ආරාධනා ලැබී තිබේ. එහිදී ප්රවීණ රංගන ශිල්පිනී දිල්හානි ඒකනායක සමඟ ප්රථම වරට රංගනයෙන් දායක වීමට ලැබීම තමන් ලැබූ භාග්යයක් බව ඇය සිහිපත් කරයි.
‘උප-චරිත’ පිළිබඳ මතය සහ ප්රවීණයන්ගේ සහයෝගය..
නවක පරපුරේ රංගන ශිල්පීන් නිරන්තරයෙන් උප-චරිත (Sub-roles) වලට පමණක් සීමා වන බවට ක්ෂේත්රය තුළ පවතින පොදු චෝදනාව පිළිබඳව අදහස් දක්වමින් අමාෂා ප්රකාශ කළේ මෙවැන්නකි:
“අපි ක්ෂේත්රයට ආපු ගමන්ම ප්රධාන චරිතයක් බලාපොරොත්තු වෙන්න බැහැ. අධ්යක්ෂකවරු අපේ හැකියාව දකින්න ඕනේ. චරිතය කුඩා වුවත්, විශාල වුවත් අපිට ලැබෙන අවස්ථාව තමයි ඉදිරියට යන්න පුළුවන් පාර.”
“හුස්මක් ළඟින්” ටෙලි නාට්යයේ ‘දැහැමි’ නම් ප්රධාන භූමිකාව සඳහා තමන්ව නිර්දේශ කළ සහය අධ්යක්ෂ අක්ෂිත සමල් ඇතුළු අධ්යක්ෂ ශියන්ත ප්රසාද් සහ තිර රචක නිදුක් මධුෂික යන මහත්වරුන්ව ඇය කෘතවේදීව සිහිපත් කළාය. එමෙන්ම, මීට පෙර ධනුෂ්ක රත්නායක අධ්යක්ෂණය කළ “තරු ආදරය” ටෙලි නාට්යයේ ‘නටාෂා’ නම් කාර්යාලීය කාන්තාවකගේ චරිතය නිරූපණය කිරීමට ලැබීම ද ඇයගේ ගමනට විශාල ශක්තියක් වී ඇත.
ප්රවීණ ශිල්පීන්ගෙන් ලැබෙන සහයෝගය අගය කළ ඇය, සනත් විමලසිරි සහ “හුස්මක් ළඟින්” හි ඇයගේ මවගේ චරිතය රඟපාන අනුරාධා පාලුකගේ වැනි ශිල්පීන් දෙබස් හැසිරවීමේදී සහ රංගන උපක්රම භාවිතයේදී තමන්ට ලබාදෙන ගුරුහරුකම් අතිශය වැදගත් වන බව පැවසුවාය.
අධ්යාපනය සහ ඉදිරි බලාපොරොත්තු..
පාසල් වියේදී නර්තන විෂය හදාරා ඇති අමාෂා, දැනට Horizon Campus පෞද්ගලික විශ්වවිද්යාලයේ අධ්යාපනය පිළිබඳ උපාධියක් (Bachelor of Education) හදාරමින් සිටී. අධ්යාපන කටයුතු මෙන්ම රංගන කටයුතු සමබරව පවත්වාගෙන යාමට ඇය උත්සාහ කරයි.
මලයාලම් සිනමාවට වඩාත් ප්රිය කරන ඇය, විවේකී වේලාවන්හිදී චිත්රපට නැරඹීමට සහ නවකතා කියවීමට ප්රිය කරයි. බදුල්ලේ සිට කොළඹ දක්වා පැමිණි මෙම කලා චාරිකාවේදී තම මව්පියන් සහ සහෝදරයා ලබාදෙන අසීමිත සහයෝගය ඇයගේ සාර්ථකත්වයේ රහසයි.
තමන් තවමත් රංගනය ඉගෙනගන්නා අවධියක පසුවන බවත්, ප්රවීණයන් දෙස බලා අත්දැකීම් ලබාගන්නා බවත් පවසන අමාෂා දිල්රංගා, ඉදිරියේදී ලාංකීය කලා ක්ෂේත්රය තුළ ගුණාත්මක නිර්මාණ ඔස්සේ දිගු ගමනක් යාමට අපේක්ෂා කරයි.