නුවර එළිය දිස්ත්‍රික් මහ රෝහලේ පසුගිය අප්‍රේල් මාසයේ සිදු කරනු ලැබූ අක්ෂි සැත්කම්වලින් දෙදෙනෙකු මුළුමනින්ම අන්ධභාවයට පත් වී තවත් 17 දෙනෙකුට සංකූලතා මතු කර ඇතැයි රජයේ වෛද්‍යවරුන්ගේ සංගමය තහවුරු කර තිබෙනවා.
මෙම පිරිස වාර්තා වී ඇත්තේ අප්‍රේල් මාසයේ දී සිදු කළ සැත්කම් 37 ක් අතරින් බව ඊයේ (31) නුවර එළිය දිස්ත්‍රික් මහ රෝහලේ පැවති රජයේ වෛද්‍යවරුන්ගේ සංගමයේ මාධ්‍ය හමුවක දී එම රෝහලේ වෛද්‍යවරු පවසා සිටියා.
එහි දී අදහස් දැක්වූ අක්ෂි විශේෂ වෛද්‍ය කණිෂ්ක මහතා පැවසුවේ මේ සම්බන්ධයෙන් යම් යම් තොරතුරු සමාජ ගත වුවත් සත්‍ය තොරතුරු අනාවරණය නොවීම නිසා මේ පිළිබඳ මහජනතාව දැනුම්වත් කිරීම සඳහා මෙම මාධ්‍ය හමුව කැඳවූ බවයි.
මෙම තත්ත්වයට අක්ෂි සඳහා භාවිත කරනු ලබන පෙඩ්නසිලෝන් නැමති ඖෂධය හේතුව බවයි මෙහි දී සඳහන් වුණේ.
පෙඩ්නසිලෝන් පසුගිය කාල සීමාව පුරා නොයෙකුත් බාල ඖෂධ මෙරටට ගෙන්වීමේ මෆියාවේම තවත් ප්‍රතිඵලයක් බව රජයේ වෛද්‍ය නිලධාරීන්ගේ සංගමය වැඩිදුරටත් සඳහන් කළා.
