වත්මන් ජනාධිපති රනිල් වික්රමසිංහ මහතා ට ජනාධිපති ධුරය ලබා දීමට ශ්‍රී ලංකා පොදු ජන පෙරමුණ තීරණය කළේ ඒ වන විට රටේ ප්‍රජාතන්ත්‍ර විරෝධී පාලනයක් බිහි වෙමින් පැවති නිසා පමණක් බව එම පක්ෂයේ මහලේකම් පාර්ලිමේන්තු මන්ත්‍රී සාගර කාරියවසම් මහතා පවසා තිබෙනවා.
ඔහු මේ බව පැවසුවේ පොදුජන පෙරමුණේ මූලස්ථානයේ පැවැති මාධ්‍ය හමුවකදී ය.
රනිල් වික්රමසිංහ යනු එල්ටීටීඊ සංවිධානයට එරෙහිව පැවැති යුද්ධයේ දී ඊට සහයෝගය නොදුන් නායකයෙක් බව ඔහු පවසා තිබෙනවා.
එමෙන්ම වික්රමසිංහ මහතා 2015 යහපාලන ආණ්ඩුව සමයේ මහ බැංකුවේ මහ මංකොල්ලයක් සිදුවෙද්දී ඇස් කන් පියාගෙන බලාගෙන හිටපු සිටි නායකයෙක් බවද ඔහු මෙහි දී සඳහන් කළා.
ඔහු වැඩි දුරටත් පැවසුවේ ඒ පිළිබඳ ප්‍රසිද්ධියේ කීමට තමා කිසිවිටක බියක් නොදක්වන බවයි.
ප්‍රජාතන්ත්‍ර විරෝධී පාලනයක් ඇති වීමට යන බව තම පක්‍ෂයට පෙනුන නිසා වික්රමසිංහ මහතා ජනාධිපති ධුරයට පත්කිරීමට තීරණය කරනු ලද බවත් එම තීරණය නිවැරදි බව මේ වන විට ඔප්පු වී ඇති බවද හෙතෙම තවදුරටත් එහිදී කියා සිටියා.
