රාමසාන් චාරිත්‍ර වාරිත්‍ර යනු වර්තමාන දූෂිත සමාජ ක්‍රමය විසින් මිනිසුන්ගෙන් බලහත්කාරයෙන් ඈත් කර ඇති මනුෂ්‍යත්වයේ සහ ආත්ම පරිත්‍යාගයේ ගුණාංග සිහිපත් කිරීමේ උත්සාහයක් යැයි ජාතික ජන බලවේගයේ නායක අනුර කුමාර දිසානායක මහතා පවසනවා.
අදට (10) යෙදී ඇති රාමසාන් දිනය වෙනුවෙන් සුබ පතමින් එම අදහස් එක් කළ ඔහු එම උත්සවය සමරන ශ්‍රී ලාංකීය මුස්ලිම් බැතිමතුන් වෙත ජාතික ජන බලයේ සුභ පැතුම් එක් කිරීමට කටයුතු කර තිබෙනවා.
“රාමසාන් උත්සවයේ අරමුණ වන්නේ එදිනෙදා ජීවිතයේ දුෂ්කරතා ඉවසීමෙන් මාසයක් උපවාසයේ යෙදීමෙන් ඉතිරි වන ධනය අපගේ සහෝදර ජනතාවට උපකාර කිරීම සඳහා යෙදවීමයි.
වසර හැත්තෑ හයක දූෂිත දේශපාලනයෙන් රටත් ජනතාවත් ඇද දමා ඇති ආර්ථික හා සමාජීය ව්‍යසනය අපි දකිමින් සිටිමු. කෑදර දේශපාලන අවශ්‍යතා වෙනුවෙන් ජාතිවාදය හා ආගම් මත පදනම්ව මිනිසුන් බෙදීමේ දුෂ්ට ප්‍රවණතා සහ ඒ සඳහා භූමිය ලෙයින් තෙත් කර ඇති ආකාරය අපි අත්විඳ තිබෙනවා.
එසේ වුවද, සමාජය දැනුවත්ව මෙම දූෂිත හා කෑදරකම ප්‍රතික්ෂේප කිරීම සතුටට කරුණක්” බවයි එම නිවේදනයේ වැඩිදුරටත් සඳහන් වෙන්නේ.
