ඊශ්‍රායල ප්‍රහාරවලින් මේ වන විට දරුවන් 127 ක් සහ කාන්තාවන් 261 ක් ඇතුළුව රට පුරා පුද්ගලයින් 2,000 කට වැඩි පිරිසක් මිය ගොස් ඇති බව ලෙබනනයේ සෞඛ්‍ය අමාත්‍යාංශය තහවුරු කර තිබෙනවා.
ඊශ්‍රායල ගුවන් ප්‍රහාරවලින් බේරීම සඳහා ලක්ෂ සංඛ්‍යාත සිවිල් වැසියන්ට ලෙබනන් අගනුවර බේරූට්හි සිය නිවෙස් හැර යාමට සිදුවී ඇති බව ද එරට මාධ්‍ය වාර්තා පෙන්වා දෙනවා.
අල් ජසීරා වාර්තා කර තිබුණේ බේරූට් නගර මධ්‍යයේ පිහිටි එක් සුඛෝපභෝගී රාත්‍රී සමාජ ශාලාවක, ඊශ්‍රායලයේ බෝම්බ ප්‍රහාරයෙන් අවතැන් වූ ජනතාවට රැකවරණය ලබා දී ඇති බවයි.
ඊශ්‍රායල හමුදාව කළ පෙර දැනුම්දීමකට අනුව දකුණු බේරූට්හි ප්‍රදේශ කිහිපයක පදිංචිකරුවන්ට ඔවුන්ගේ නිවෙස්වලින් පිටව යාමට සිදු වුණා.
ඊශ්‍රායලය විසින් බලහත්කාරයෙන් ඉවත් කිරීමේ නිවේදනයක් නිකුත් කිරීමෙන් ටික වේලාවකට පසු බේරූට් හි විශාල පිපිරීමක් වාර්තා වී ඇති බව ද රොයිටර් පුවත් සේවය වාර්තා කළා.
