පෙන්ගුයින් තම සහකරුවන් සමඟ සදහටම රැඳී සිටීම සඳහා කැපවු බව කියන කුඩා ජීවීන් කොට්ඨාශයකි.
ඒත් එම මතය බිඳ දමමින් ඕස්ට්‍රේලියාවේ වික්ටෝරියා හි ෆිලිප් දූපතේ (Phillip Island)හි පෙන්ගුයින් දික්කසාද අනුපාතය ඉහළ යමින් පවතින බව මෑතකදී අනාවරණය වුණා.
මෙම සොයා ගැනීම සිදු කළේ මොනෑෂ් විශ්ව විද්‍යාලය සහ පිලිප් අයිලන්ඩ් නේචර් පාර්ක්ස් විසින් දශකයකට වැඩි කාලයක් පුරා සිදු කරන ලද පර්යේෂණයකිනි.
පිලිප් දූපත කුඩා පෙන්ගුයින් 37,000 කගේ නිවහන වන අතර එය ලෝකයේ විශාලතම පෙන්ගුයින් ජනපදයටයි.
මේ විශාල පෙන්ගුයින් ජනපදයේ ප්‍රජනන අනාගතය ගැන පුරෝකථනය කිරීම සඳහා සිදු කෙරුණ පර්යේෂණයේ දී ඔවුන්ගේ සංකීර්ණ ආදර ජීවිතය ගැඹුරින් සලකා බැලූ බව මොනෑෂ් සරසවිය ඔවුන්ගේ වෙබ් අඩවියේ සඳහන් කර තිබෙනවා.
පෙන්ගුයින් අතර දික්කසාද වැඩි වීමට බලපා ඇත්තේ ඔවුන්ගේ කැදැල්ල පුරවන දරුවන් ගණනින් ඔවුන් සෑහීමට පත් නොවන විටයි.
නමුත් එය ඔවුන්ගේ මීළඟ අභිජනන උත්සාහයේ සාර්ථකත්වය අඩු කළ හැකි අවදානම් තීරණයක් බව පර්යේෂණයෙන් අනාවරණය වුණා.
පර්යේෂකයන් සොයාගෙන ඇත්තේ පෙන්ගුවින් අතර දික්කසාද වීමේ අනුපාතය වැඩිවීම අභිජාන සමයක නැවත යුගල බවට පත්වීමට ඇති දුෂ්කරතා වැනි කරුණු නිසා පෙන්ගුයින්ලාගේ ජනපදය පුරා ප්‍රජනන සාර්ථකත්වය අඩු වීමට හේතු වී ඇති බවයි.
මොනෑෂ් විශ්වවිද්‍යාලයේ ජීව විද්‍යා පාසලේ පරිසර භෞතික විද්‍යාව සහ සංරක්ෂණ පර්යේෂණ කණ්ඩායමේ ප්‍රධානී මහාචාර්ය රිචඩ් රෙයිනා වසර 20ක් දිවයිනේ පෙන්ගුයින් අධ්‍යයනය කළ විශේෂඥයෙකි. පෙන්ගුයින්ලා ජීවිත කාලයම එක් සහකරුවෙකුට සීමාවන බවට වන ජනප්‍රිය විශ්වාසයට පටහැනිව ඔහු පවසන්නේ පෙන්ගුවින් ජීවිතයට එක් හවුල් කරුවෙකුට පමණක් සීමා නොවන බවයි.
“හොඳ කාලවලදී, ඔවුන් බොහෝ දුරට ඔවුන්ගේ හවුල්කරුවන් සමඟ රැඳී සිටිනවා, එහෙත් දුර්වල ප්‍රජනන සමයකින් පසු, ඔවුන්ගේ අභිජනන සාර්ථකත්වය වැඩි කර ගැනීම සඳහා ඊළඟ සමයේ දී නව සහකරුවෙකු සොයා ගැනීමට ඔවුන් උත්සාහ කරනවා”
මෙම අධ්‍යයනය පෙන්ගුයින් අභිජනන වාර 13ක් පරීක්ෂා කිරීමෙන් සිදු කරනු ලැබූවකි.
