රෝහල්වල පවතින අත්‍යාවශ්‍ය ඖෂධ හිඟය මග හරවා ගැනීම සඳහා සෞඛ්‍ය අමාත්‍යාංශය ඖෂධ ගෙන්වීමට සූදානම් වන ඉන්දීය සමාගම කොන්ඩම් නිෂ්පාදන සමාගමක් බව වෛද්‍ය හා සිවිල් අයිතිවාසිකම් පිළිබඳ වෛද්‍යවරුන්ගේ වෘත්තීය සමිති සන්ධානයේ සභාපති චමල් සංජීව මහතා පවසනවා.
කොළඹ ඊයේ (22 වැනිදා) පැවැති මාධ්‍ය හමුවකදී සභාපතිවරයා සඳහන් කළේ මෙවැනි සමාගමකට විවිධත්වයකින් යුතු ඖෂධ වර්ග සැලකිය යුතු ප්‍රමාණයක් සැපයීමට පවතින හැකියාව ප්‍රශ්න සහගත බවත් වහාම මෙම සමාගම සම්බන්ධයෙන් පසු විපරමක් සිදු කළ යුතු බවත්ය.
මෙතෙක් කල් මෙරටට ඖෂධ ආනයනය කරනු ලැබුවේ රාජ්‍ය ඖෂධ නීතිගත සංස්ථාව සහ පෞද්ගලික ඖෂධ ආනයනකරුවන් විසිනි.
අත්‍යාවශ්‍ය ඖෂධ මිලදී ගැනීම සඳහා ඉන්දියානු රජය සමග ගිවිසුම්ගත වීමට සෞඛ්‍ය අමාත්‍යාංශය තීරණය කර ඇති බවට පසුගිය ජූලි 23 වැනිදා වර්තමාන සෞඛ්‍ය ඇමැතිවරයා විසින් නිකුත් කරන ලද කැබිනට් පත්‍රිකාවෙන් තහවුරු වී තිබෙනවා.
එම නිසා මෙම කැබිනට් පත්‍රිකාව අනුමත කිරීමට පෙර මෙම කොන්ඩම් නිෂ්පාදන සමාගම සම්බන්ධව පසු විපරමක් කරන ලෙස සභාපතිවරයා ජනාධිපතිවරයාගෙන් ද ඉල්ලා සිටියා.
මෙරට තුළ සෞඛ්‍ය සේවය අඛණ්ඩව පවත්වාගෙන යාම සඳහා අවශ්‍ය කරන ඖෂධ වර්ග 862ක් හඳුනාගෙන තිබෙනවා.
කෙසේ වෙතත් මෙම වැඩපිළිවෙළ හේතුවෙන් ඖෂධ ආනයනය රාජ්‍ය ඖෂධ නීතිගත සංස්ථාවෙන් සහ පෞද්ගලික ඖෂධ ආනයනකරුවන්ගෙන් ගිලිහෙන බවද ඒ මහතා වැඩි දුරටත් සඳහන් කළා.
