ඇමරිකානු ජනාධිපති ජෝ බයිඩන් ඔහුගේ වසර හතරක ධුර කාලයෙන් දින 532ක් සාමාන්‍ය නිවාඩු දින ලෙස ලබාගෙන ඇති බව රිපබ්ලිකන් ජාතික කමිටුව කළ විශ්ලේෂණයකදී හෙළි වී ඇතැයි නිව්යෝර්ක් පෝස්ට් පුවත්පත වාර්තා කර තිබෙනවා.
එය ඇමරිකාවේ සාමාන්‍ය කාර්යාල සේවකයෙකු වසර 48කදී ලබා ගන්නා සාමාන්‍ය නිවාඩු ගණනට සමාන බවයි එම පුවත්පත වාර්තා කර තිබෙන්නේ.
ඇමරිකාවේ කාර්යාල සේවකයෙකුට වසරකට ලැබෙන්නේ සාමාන්‍ය නිවාඩු දින 11ක් බවත් ඒ අනුව ඇමරිකානු කාර්යාල සේවකයෙකුට වසර පනහක කාලයක් සඳහා ලැබෙන සාමාන්‍ය නිවාඩු දින ගණන ජනාධිපති බයිඩන් වසර හතරක ධුර කාලය තුළ භුක්ති විඳ ඇති බව සඳහන් වෙනවා.
ජනපති බයිඩන් දින 1326 ක ඔහුගේ ධුර කාලය තුළදී දින 532ක විවේක කාලයක් ගත කර ඇති බවත් ඒ අනුව ඔහුගේ ධුර කාලයෙන් 40% ක් ඔහු නිවාඩු ලබාගෙන ඇති බව රිපබ්ලිකන් ජාතික කමිටුව කළ විශ්ලේෂයෙන් අනාවරණය වී තිබෙනවා.
ජනාධිපති බයිඩන් මෙම මස 07 වැනි දා ඩෙලවෙයාර් ප්‍රාන්තයේ රෙහොබොත් වෙරළේ විවේකීව ගත කළ අතර එය ඔහු එක දිගට ලබාගත් 16 වන නිවාඩුව බවද රිපබ්ලිකන් ජාතික කමිටුව අනාවරණය කර ඇති බව නිව්යෝර්ක් පෝස්ට් පුවත්පත වාර්තා කර තිබෙනවා.
කෙසේ වෙතත් ගෝලීය අවිනිශ්චතාවයන් බහුල කාලයක සහ ඇමරිකාවේ උද්ධමනය ඉහළ ගොස් බඩු මිල සාමාන්‍ය ජනතාවට දරා ගත නොහැකි මට්ටමක තිබෙන මොහොතක ජනාධිපතිවරයා මේ සා නිවාඩු ප්‍රමාණයක් ලබා ගැනීම කිසිසේත් සාධාරණීකරණය කර නොහැකි බවට මේ සමග විවේචන එල්ල වෙමින් පවතින බවයි පුවත්පත වැඩිදුරටත් සඳහන් කර ඇත්‍තේ.
