ශ්‍රී ලංකාවේ 16 වන අග්‍රාමාත්‍යවරිය ලෙස තේරී පත් වූ ආචාර්ය හරිනි අමරසූරිය මහත්මිය අද (24) පස්වරුවේ කොළඹ මල් පාරේ පිහිටි අග්‍රාමාත්‍ය කාර්යාලයේ දී සිය ධුරයේ වැඩ ආරම්භ කළා.
ඒ දකුණු ආසියාවේ සියලු ම රටවලින් දේශපාලන පවුල් පසුබිමක් නොමැතිව අගමැති ධුරයට පත් වූ ප්‍රථම කාන්තාව ලෙසයි.
ජනතාව අපේක්ෂා කළ ඒ වෙනස සිදු කිරීමට වත්මන් රජය සූදානම් බවත්, ඒ වෙනුවෙන් සියලු දෙනාගේ කැපවීම සහ සහයෝගය අපේක්ෂා කරන බවත් අග්‍රාමාත්‍යවරිය මෙහි දී පවසා තිබෙනවා.
මේ අතර අභිනවයෙන් පත් වූ අග්‍රාමාත්‍ය ලේකම් ජී. සපුතන්ත්‍රි මහතා ද අග්‍රාමාත්‍ය කාර්යාලයේ දී සිය ධුරයේ වැඩ ආරම්භ කළ බවයි වාර්තා වන්නේ.
