(Lakvahini) – ශ්රී ලංකාවේ ටෙලි නාට්ය ක්ෂේත්රය තුළ ප්රකට නිළියක වන නයෝමි පෙරේරා, සිනමා කර්මාන්තයට සාර්ථකව අවතීර්ණ වෙමින් මේ වසරේදී නව චිත්රපට ත්රිත්වයකට දායක වී ඇති බව ප්රකාශ කරයි. සමාජ මාධ්ය හරහා ක්ෂේත්රයට පිවිසීමට නවකයන්ට අවස්ථාවන් නිර්මාණය වී තිබුණද, වෘත්තීයමය වශයෙන් ඉදිරියට යාම සඳහා අඛණ්ඩ හැදෑරීම සහ දැඩි විනයක් පවත්වා ගැනීම අත්යවශ්ය සාධක බව ඇය අවධාරණය කර සිටී.
ලක්වාහිනී අප සමග අදහස් දක්වමින් ඇය කියා සිටියේ ප්රවීණ ගායන ශිල්පී මිල්ටන් මල්ලවාරච්චි මහතාගේ ජීවිත කතාව අලලා අරුණ ජයවර්ධන අධ්යක්ෂණය කරන “එදා රෑ” චිත්රපටය සිය සිනමා ගමනේ සන්ධිස්ථානයක් වනු ඇති බවයි. සුනෙත් මාලිංගගේ තිර රචනයෙන් සහ චන්න දේශප්රියගේ කැමරාකරණයෙන් හැඩවන මෙම නිර්මාණයේදී, ප්රධාන චරිතය නිරූපණය කරන රොෂාන් රණවන ඇතුළු ප්රවීණ ශිල්පීන් රැසක් සමඟ කටයුතු කිරීමට තමන්ට අවස්ථාව ලැබුණු බව ඇය සඳහන් කළාය.
මීට අමතරව, “ප්රේමියේ” සහ “පිස්Zoo” යන නව චිත්රපට ද ඇතුළුව මෙතෙක් තමන් නිරූපණය කළ සෑම චරිතයක්ම එකිනෙකට වෙනස් ස්වරූපයක් ගත් බවත්, ඉදිරියේදී වඩාත් සංවේදී (Emotional) චරිත නිරූපණය කිරීමට අපේක්ෂාවෙන් පසුවන බවත් ඇය පැවසුවාය.
හැදෑරීම සහ ක්ෂේත්රයේ අභියෝග..
තමන් මුල් වකවානුවේදී නිරූපණ ක්ෂේත්රය සහ අවුරුදු කුමරි තරඟාවලියක් හරහා පූර්ව හැදෑරීමකින් තොරව රංගනයට පිවිසි බව සිහිපත් කළ නයෝමි පෙරේරා, කාලයත් සමඟ ප්රවීණයන් ඇසුරෙන් ලබාගත් අත්දැකීම් සිය වෘත්තීය ජීවිතය හැඩගැස්වීමට ඉවහල් වූ බව ප්රකාශ කළාය.
“වත්මන් සමාජ මාධ්ය (TikTok, Facebook, Instagram) ඔස්සේ නවකයන්ට අවස්ථා ලැබීම යහපත් ප්රවණතාවක්. නමුත් ක්ෂේත්රයේ දිගුකාලීනව රැඳී සිටීමට නම්, කැමරාව ඉදිරියේ රඟපෑම පමණක් ප්රමාණවත් නැහැ. අධ්යක්ෂවරුන් සහ සෙසු ශිල්පීන් සමඟ ගනුදෙනු කිරීමේ වෘත්තීය විනයක් තිබිය යුතුයි. රූගත කිරීම්වලට පෙර තිර පිටපත් සහ චරිත ස්වභාවයන් (Character Profile) පිළිබඳව නිවසේ සිට පූර්ව සූදානමකින් (Homework) යුතුව පැමිණීම අනිවාර්ය කරුණක්,” යැයි ඇය වැඩිදුරටත් කියා සිටියාය.
කාලය, වාසනාව සහ ආර්ථික ස්ථාවරත්වය..
කලා ක්ෂේත්රය තුළ දක්ෂතාවය සහ කැපවීම මෙන්ම නිසි කලට ලැබෙන “වාසනාව” ද තීරණාත්මක සාධකයක් වන බව පෙන්වා දුන් නිළිය, සිය වෘත්තීය ජීවිතය තුළ මුහුණ දුන් බිඳවැටීම්, ප්රතික්ෂේප වීම් සහ අභියෝග හමුවේ නොසැලී සිටීමට සමීපතම මිතුරන්ගෙන් ලැබුණු සහයෝගය අගය කළාය.
රංගන ශිල්පියෙකු ලෙස ආර්ථික ස්වාධීනත්වයක් ගොඩනගා ගැනීම පිළිබඳව අදහස් දක්වමින් ඇය කියා සිටියේ, ක්ෂේත්රය තුළ තමන්ට ඇති ඉල්ලුම (Demand) නිර්මාණය කර ගැනීම හරහා ස්ථාවර විය හැකි බවයි. කෙසේ වෙතත්, වෘත්තීය ජනප්රියත්වය උපයෝගී කරගනිමින් රංගනයට අමතරව ස්වයං ව්යාපාරයක් ආරම්භ කිරීමේ අදහසක් ද පවතින බව ඇය මෙහිදී අනාවරණය කළාය.
ඇය සම්බන්ධ වූ නවතම ටෙලි නිර්මාණ සහ සිනමා නිර්මාණ ඉදිරි මාස කිහිපය තුළ ප්රේක්ෂකගත වීමට නියමිතය.
Lakvahini – Sri Lanka Latest News