(Lakvahini) – දශක දෙකකට ආසන්න කාලයක් ශ්රී ලාංකීය ටෙලි සහ සිනමා ක්ෂේත්රය තුළ ප්රේක්ෂක ආදරය දිනූ සම්මානනීය නිළි ශලනි තාරකා විජයබණ්ඩාර, සිය කුළුඳුල් සිනමා අධ්යක්ෂණය වන ‘ප්රේමියේ’ සිනමාපටය සමඟින් සිය කලා ජීවිතයේ නවතම සන්ධිස්ථානයක් සනිටුහන් කිරීමට සූදානම් වේ.
තිරය ඉදිරියේ රංගන ශිල්පිනියක සහ ගී පද රචිකාවියක ලෙස සිය අනන්යතාවය තහවුරු කළ ඇය, මෙවර තිරය පිටුපස දැවැන්ත කාර්යභාරයකට උරදෙමින් ‘ප්රේමියේ’ සිනමාපටයේ තිර රචනය මෙන්ම අධ්යක්ෂණය ද සිදුකර තිබීම විශේෂත්වයකි. මෙම නිර්මාණය ලාංකීය සිනමාව නව මානයකට ඔසවා තබන සුවිශේෂී හැරවුම් ලක්ෂ්යයක් වනු ඇතැයි ක්ෂේත්ර විචාරකයෝ අපේක්ෂා කරති.
වර්ණවත් නිල ප්රවර්ධන දියත් කිරීම..
චිත්රපටයේ නිල ප්රවර්ධන පෝස්ටරය සහ ටීසර් (Teaser) පටය ඊයේ (27) ශ්රී ජයවර්ධනපුර Monarch Imperial හෝටලයේදී කලා ක්ෂේත්රයේ ප්රමුඛ පෙළේ තරු රැසකගේ සහභාගිත්වයෙන් අති උත්කර්ෂවත් අන්දමින් එළිදැක්විණි.
මෙම උත්සවය සුවිශේෂී තේමාවකින් වර්ණවත් වී තිබූ අතර, එහිදී චිත්රපටයේ රංගන ශිල්පීන් සියල්ලන්ම කැපී පෙනෙන නිල් පැහැති වර්ණයෙන් සැරසී සිටි අතර, උත්සවයට ආරාධිත සෙසු පිරිස කළු පැහැති වස්ත්රාභරණයෙන් සැරසී සහභාගි වෙමින් රාත්රියට සුවිශේෂී සෞන්දර්යාත්මක වටිනාකමක් එක්කර තිබුණි.
ආදරය, කුතුහලය සහ සැඟවුණු අනන්යතාවන් පිරුණු සිනමාපටයක්..
චිත්රපටයේ කථා සාරාංශයට අනුව, එය වෘත්තීය ඡායාරූප ශිල්පියෙකු වන ප්රවීන් (දනුක දිල්ෂාන්) සහ දුප්පත් තරුණියක වන ධාරා (ශලනි තාරකා) වටා ගෙතුණු සංවේදී මෙන්ම කුතුහලයෙන් පිරි කථා පුවතකි. කොළඹින් බැහැර විවාහ මංගල උත්සවයකදී ධාරාගේ තීව්ර බැල්මෙන් වශීකෘත වන ප්රවීන්, පසුව ඇය කොළඹ ප්රදේශයේ ප්රකෝටිපති ව්යාපාරිකයෙකු වන ගජේන්ද්ර වික්රමනායකගේ (අනුරාධ මල්ලවආරච්චි) නිවසේ මෙහෙකාර සේවයේ නියුතු බව දැන ගනී.
දැඩි ආරක්ෂක බාධක මධ්යයේ වුවද ඇය සමඟ සමීප සබඳතාවක් ගොඩනගා ගන්නා ප්රවීන්ට, ධාරාගේ ඉල්ලීම මත ඇයව එම නිවසින් රහසිගතව කැඳවාගෙන යාමට සිදුවේ. කෙසේ වෙතත්, එම ගමන අතරතුර ධාරාගේ සැබෑ අනන්යතාවය හෙළිවීමත් සමඟ මුළු කථා පුවතම උඩුයටිකුරු වන අතර, චිත්රපටයේ මධ්ය භාගයේදී ‘සූර්යා’ (දර්ශන් තවරාජා) නම් අභිරහස් චරිතයක පැමිණීමත් සමඟ ප්රේක්ෂකයා දැඩි කුතුහලයකට ඇද දැමීමට නිර්මාණකරුවන් සමත්ව ඇත.
දශක දෙකක කලා චාරිකාව සහ නව පරිච්ඡේදය..
1990 නොවැම්බර් 15 වනදා බලංගොඩදී උපත ලබා, මීගමුව නිව්ස්ටඩ් බාලිකා විද්යාලයෙන් අධ්යාපනය හැදෑරූ ශලනි තාරකා, මෙරට කලා ක්ෂේත්රයට අවතීර්ණ වූයේ 2007 වසරේ ‘සිරස කුමරිය’ කිරුළ දිනා ගනිමිනි. ‘පූජාසනය’ ටෙලි නාට්යයෙන් රංගනයට පිවිසි ඇය, ‘සෙල්වම්’ සිනමාපටය හරහා රිදී තිරයට පිවිසියාය.
පසුව ‘ගිරිදේවි’, ‘අඩෝ’ සහ ‘කියා දෙන්න ආදරේ තරම්’ වැනි අතිශය ජනප්රිය නිර්මාණ රැසකට දායක වෙමින් සුමති සහ රයිගම් ටෙලීස් සම්මාන උළෙලන්හි හොඳම සහ ජනප්රියම නිළිය ලෙස අභිෂේක ලැබීමට ඇය සමත් වූවාය.
රංගනය සහ අධ්යක්ෂණයට අමතරව ඇය ලියූ නවතම ටෙලි නාට්ය පිටපතක් ද ඉදිරියේදී ස්වාධීන රූපවාහිනී සේවය (ITN) ඔස්සේ විකාශනය වීමට නියමිතය. එසේම ඇය ප්රධාන නිළිය ලෙස රංගනයෙන් දායක වන ‘Unlock’, ‘සරා සුසුම්’, ‘කන්නගී’ සහ ‘යකාගේ කතාවක් 1’ වැනි දැවැන්ත සිනමා පට පෙළගැස්ම ඉදිරියේදී තිරගත වීමට නියමිතව ඇත.
පසුබිම් නිර්මාණ කණ්ඩායම..
ආචාර්ය මාලන් ෆ්රැන්සිස් පීටර්සේගේ නිෂ්පාදනයෙන් හැඩවන ‘ප්රේමියේ’ සිනමාපටය සඳහා මෙරට සහ ජාත්යන්තර මට්ටමේ දක්ෂ තාක්ෂණික ශිල්පීන් පිරිසක් දායක වී සිටිති.
කතාව සහ පිටපත සැකසීම: ගයනි අසිංසලා පියදිගම
කැමරා අධ්යක්ෂණය: ගෝපි ජගදීෂ්වරන් (ඉන්දියාව)
සංගීත අධ්යක්ෂණය: ක්රිෂාන් කරුණාරත්න
සංස්කරණය: ශාන් අල්විස්
ඇඳුම් නිර්මාණය: රැෆෙලා ෆනැන්ඩෝ
නිෂ්පාදන නිර්මාණ සැලසුම්කරණය: ශාන් ජයරත්න
විධායක නිෂ්පාදනය: මෙවන් ලියනගේ
ප්රධාන රංගනය: ශලනි තාරකා, දනුක දිල්ෂාන්, දර්ශන් තවරාජා, අනුරාධ මල්ලවආරච්චි, නිරෝෂන් විජේසිංහ, කාවිංග පෙරේරා, චතුර රාජපක්ෂ, සාශා කරුණාරත්න,අමන්දා ජයරත්න, දසුනි නවෝද්යා, නයෝමි පෙරේරා, මීනා කුමාරි, සුමිත් ඉලංගෝ, නිර්මා සුරාජි, රුමේෂා ජයකොඩි, සචින්තනී කෞෂල්යයා, මනීෂා කන්දෙකුඹුර, සංගීත් ප්රභූ, අශේන් අප්පුහාමි, සුහන්දි උපේත්මා, ශැගී වීරනායක, විරාජ් පෙරේරා, උපතිස්ස බාලසූරිය,සිසිර ගීකියනගේ ඇතුළු පිරිසක්.
ගීත ගායනය: බාචි සුසාන්, රවීන් තාරුක, මහේෂා සඳමාලි, අපූර්වා ආශාවරී සහ දිලුම් අනුරාධ.
ප්රේමයේ, අභිරහසේ සහ සංවේදීතාවයේ අපූර්ව මුසුවක් වන ‘ප්රේමියේ’ සිනමාපටය, ඉදිරියේදී දිවයින පුරා සිනමාශාලාවල ප්රදර්ශනය වීමට නියමිතය.