රාජ්‍ය පරිපාලන, ස්වදේශ කටයුතු, පළාත් සභා සහ පළාත් පාලන අමාත්‍යංශයේ හිටපු ජ්‍යෙෂ්ඨ නිලධාරියකු තමන්ට ලබාදී තිබූ නිල රථය ආපසු භාර නොදීම සම්බන්ධයෙන් විමර්ශනයට ලක්ව සිටින බව වාර්තා වේ.
මෙම හෙළිදරව්ව සිදුකර ඇත්තේ ජාතික විගණන කාර්යාලය විසින් නිකුත් කරන ලද නවතම විගණන වාර්තාව මගිනි.
අදාළ ලේකම්වරයා වෙනත් අමාත්‍යංශයකට මාරු කළද මාස 10කට වැඩි කාලයක් නිල රථය භාරදී නොමැති බව එම වාර්තාව හෙළි කරයි.
අදාළ ලේකම්වරයාගේ මාරු වීම 2022 දෙසැම්බර් 31 දින සිදුකළත් අමාත්‍යංශයට අයත් Toyota Land Cruiser V 8 වර්ගයේ රථය ඔහු විසින් මේ වනතුරු එම වාහනය නිල වශයෙන් අමාත්‍යංශයට හෝ ඔහුගේ වත්මන් අමාත්‍යංශයට පවරා දී නැත.
අතුරුදන් වූ රාජ්‍ය වාහනය සම්බන්ධයෙන් රාජ්‍ය පරිපාලන, ස්වදේශ කටයුතු, පළාත් සභා සහ පළාත් පාලන අමාත්‍යංශයේ ලේකම් රංජිත් අශෝක පවසන්නේ, වාහනය ආපසු ලබා නොදුන් හිටපු ලේකම්වරයා මේ වන විට වෙනත් අමාත්‍යංශයක ද්විත්ව භූමිකාවක් දරන බවයි.
වාහනය මාරු කරගන්නා ලෙසට කිහිපවතාවක්ම දැනුම් දී ඇතත් එම නිලධාරියා එම ඉල්ලීම ඉටුකර නැති බව දැනගන්නට ඇත.
මෙම නිලධාරියා මාස කිහිපයකින් විශ්‍රාම යෑමට නියමිත අතර ඔහු පිටත්ව යාමට පෙර වාහනය ආපසු ලබාගැනීමට අමාත්‍යංශය අපේක්ෂා කරයි.
මීට අමතරව, වාහනය ඔහුගේ වත්මන් අමාත්‍යංශයට පැවරීමේ හැකියාව ඇති බව නිලධාරියාට දන්වා ඇතත් ඔහු තවමත් මෙම යෝජනා හෝ ඉල්ලීම් කිසිවකට ප්‍රතිචාර දක්වා නැති බව වාර්තා වෙයි.
