ඉන්ධන මිල තවදුරටත් පහළ දැමිය හැකි බවත් නව රජය ඉන්ධන මිල අඩු කර ඇත්තේ ද පැවති මිල සූත්‍රයට අනුවම බව සමගි ජන බලවේගයේ වෘත්තිය සමිති සන්ධානය පවසනවා.
ඒ අනුව එහි කැඳවුම්කරු ආනන්ද පාලිත මහතා චෝදනා කර සිටියේ ලෝක වෙළඳ පොළේ සියලුම වර්ගයේ ඉන්ධන මිල අඩු වී ඇති මොහොතක පැවති ගසා කන සූත්‍රයටම ඉන්ධන මිල අඩුකිරීමට සිය සන්ධානය විරුද්ධ බවයි.
වැඩි දුරටත් අදහස් දැක් වූ ඒ මහතා..,
“කාංචනගේ සාක්කුවට රු 160ක් ගියා කීයලා සුනිල් හන්නෙත්ති මහත්තයම කිව්ව සූත්‍රය අනුව ඩීසල් ලීටරය රු 86 කින් අවමය අඩු කරන්න තිබුණ එක, අඩු නොකර පරණ සූත්‍රයටම අනුව රු 24 කින් අඩුකරලා. ගසා කන සූත්‍රය එලෙසම තියෙනවා.”
මේ අතර අමාත්‍ය මණ්ඩල තීරණ දැනුම් දෙමින් විජිත හේරත් මහතා සඳහන් කළේ ඉන්ධන මිල මෙම කාල සීමාව තුළ සැලකිය යුතු මට්ටමකින් අඩු කළේ නව ජනාධිපති අනුර කුමාර දිසානායක මහතාගේ පත්වීමෙන් අනතුරුව බවයි.
තෙල් මිල අඩු කිරීම සිදු කළේ ඛනිජ තෙල් සංස්ථාව සමඟ කළ සමාලෝචනයකට අනුවයි.
ඒ අනුව ඉන්ධන මිල අඩු කළේ මිල සූත්‍රයට අනුවම නොවන බව ඔහු මාධ්‍යවේදියෙකු නැගූ ප්‍රශ්ණයකට පිළිතුරු දෙමින් පැවසුවා.
තෙල් මිල විශාල වශයෙන් අඩුකරන්න කැමති වුවත් එහි ලාභ පාඩු තත්ත්වයක් අධ්‍යයනයකින් පසුව එය කළ යුතු බවයි ඔහු සඳහන් කළේ.
එකපාර එකසිය දෙසීය ගණන්වලින් අඩු කළොත් මූල්‍ය තත්ත්වයට එය බලපාන බවත් ක්‍රමයෙන් තෙල් මිල අඩු කිරීමට කටයුතු කරන බව ඒ මහතා කියා සිටියා.
