ආසියානු කලාපය පුර මේ වන විට ව්‍යාප්ත වෙමින් පවතින නව කොවිඩ් ප්‍රභේදය ශීඝ්‍රයෙන් ව්‍යාප්ත වන්නේදැයි සොයාබැලීම සඳහා රට පුරා PCR පරීක්ෂණ වැඩිකිරීමට සෞඛ්‍ය අංශ කටයුතු කරමින් සිටින බව සෞඛ්‍ය හා ජනමාධ්‍ය අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ මහතා ප්‍රකාශ කර තිබෙනවා.
ඊයේ (28) පැවති ප්‍රවෘත්ති සාකච්ඡාවකදී ඔහු පැවසුවේ නව කොවිඩ් ප්‍රභේදය පිළිබඳව ජනතාව මේ අවස්ථාවේ බියවිය යුතු නැතැත් එය මෙරටට පැමිණීමේ අවදානමක් නොමැති බව ප්‍රකාශ කළ නොහැකි බවය.
මහජනතාව නැවත මාක්ස් පැළඳීම සිදු කළ යුතුදැයි මාධ්‍ය කළ විමසීමකට පිළිතුරු දෙමින් අනිල් ජාසිංහ මහතා සඳහන් කළේ යම් අයෙකුට උණ, කැස්ස,සෙම්ප්‍රතිශ්‍යාව වැනි රෝග ලක්ෂණ පවතින්නේ නම් හැකිතාක් මාක්ස් පැළඳීමට උතසහ කරන ලෙසයි.
මේ පිළිබඳ වැඩිදුරටත් අදහස් දැක්වු වෛද්‍ය අනිල් ජාසිංහ මහතා,
“අපි නැවතත් වසංගත විද්‍යා අංශය ඇතුළු කණ්ඩායම් රැස් කරලා, ඊයේ තමා ප්‍රධාන සාකච්ඡාව පැවැත්වුයේ. අපිට කියන්න තියෙන්නේ මේ අවස්ථාවේ ජනතාව බිය වීමට තරම් කාරණයක් නෑ. හැබැයි ඒකෙන් අදහස් වෙන්නේ නෑ ශ්‍රී ලංකාවට මේක එන්නේ නෑ කියලා. ආසියාවේ කොවිඩ් වැඩිවීමක් තියෙනවා. අපි ප්‍රධාන වශයෙන් මහනුවර, ගාල්ල, ජාතික රෝහල් දෙකෙහි සහ PCR තියෙන රෝහල්වල PCR කරන එක වැඩි කරා. කොහොමත් තියෙනවා උණ ගැන අවේක්ෂණ පද්ධතියක්. එකක් භාහිර රෝගීන් සම්බන්ධයෙන්, අනෙක් එක අභ්‍යන්තර රෝගීන් සම්බන්ධයෙන්. ඒ දෙකම කරනවා. ඒ හරහා අපි කොවිඩ් තියෙනවා ද කියලා අපි හඳුනාගන්නවා. ඔබට උණ, හෙම්බිරිසාව හැදුණොත් මාස්ක් එකක් පාවිච්චි කරන්න ඒක අනිත් අයට හොඳයි.”
ගෙවුණු ආසන්න කාලය තුළ ගෝලීය කොවිඩ් ආසාදිතයින් සංඛ්‍යාවේ යම් ඉහළයාමක් පෙන්නුම් කරන අතර අසල්වැසි ඉන්දියාවේ ප්‍රදේශ කිහිපයක් පුරා ද එය ව්‍යාප්ත වෙමින් පවතී.
ලෝක සෞඛ්‍ය සංවිධානයට අනුව මෙලෙස කොවිඩ් සුලබ ව්‍යාප්තියක් වාර්තාවන්නේ මධ්‍යධරණී රටවල, අග්නිදිග ආසියානු රටවල සහ බටහිර පැසිෆික් කලාපීය රටවලිනි.
ඒ අනුව රටවල් රැසකින් මේ වන විට වාර්තා වී තිබෙන්නේ JN 1, LF 7 සහ NB 1.8.1 වැනි කොවිඩ් උප ප්‍රභේද ගණනාවකි.
LF 7 සහ NB 1.8.1 කොවිඩ් උප ප්‍රභේද ලෝක සෞඛ්‍ය සංවිධානයේ අධීක්ෂණය යටතේ පවතින උප ප්‍රභේද වශයෙන් සැලකෙනවා.
මෙවන් පසුබිමක ආසියානු රටවල ව්‍යාප්ත වෙමින් පවතින නව කොවිඩ් ප්‍රභේදය පිළිබඳව මෙරට සෞඛ්‍ය අමාත්‍යාංශය මේ වන විටත් අවධානය යොමුකර ඇති බවයි ප්‍රවෘත්ති සාකච්ඡාව අතරතුර සඳහන් කරනු ලැබුවේ.
මෙම පුවතට සම්බන්ධ තවත් විස්තර..
සඳ පෙන්වූ විට ඇඟිල්ල දෙස බලන සෞඛ්‍ය බලධාරින්ටයි….
ආසියාවේ නැවත කොවිඩ් රැල්ලක්
