මෙවර මැයි දින රැළි ආවරණය කිරීම සඳහා අවසරයකින් තොරව ඩ්‍රෝන යානා භාවිතය තහනම් කර ඇති බව පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දූව මහතා පවසනවා.
මැයි රැළි ආවරණය සඳහා ඩ්‍රෝන යානා යොදා ගැනීමට අවශ්‍ය නම් පූර්ව අනුමැතිය ඒ සඳහා ලබා ගත යුතු බවයි ඔහු පවසන්නේ.
එම නීතිය දිවයින පුරා සියලු මැයි රැළි සඳහා අදාළ වන බව පැවසෙනවා.
ජාත්‍යන්තර කම්කරු දිනය නිමිත්තෙන් හෙට (මැයි 01) පැවැත්වෙන පෙළපාලි සහ මැයි දින රැළි වෙනුවෙන් දිවයින පුරා පොලිස් නිලධාරීන් 9,000 කට වැඩි සංඛ්‍යාවක් යොදවන බව ද පොලිස් විශේෂ කාර්ය බළකායේ නිලධාරීන් 350 ක් යොදවන අතර අවශ්‍ය වුවහොත් යුද හමුදාව ද කැදවන බව ද ඔහු සඳහන් කර තිබෙනවා.
දිවයින පුරා මැයි රැළි 40 ක් පැවැත්වෙන අතර කොළඹ ප්‍රදේශයේ මැයි රැළි 14 ක් පැවැත්වෙන බවත් ඒ සදහා බස් රථ පමණක් 6,800ක් පමණ කොළඹට පැමිණීමට බවත් පොලිස් මාධ්‍ය ප්‍රකාශකවරයා කියනවා.
කොළඹට පැමිණෙන මෙම වාහන හැසිරවීමට රථවාහන නිලධාරීන් 1200 ක් පමණ යෙදවීමට නියමිතයි.