දඹුල්ල ජාත්‍යන්තර ක්‍රිකට් ක්‍රීඩාංගණයේ විදුලි පහන් සහ ඒ ආශ්‍රිත යටිතල පහසුකම් සවි කිරීම දීර්ඝ කාලීන අවශ්‍යතාවලට ප්‍රතිචාර දැක්වීමක් බව ශ්‍රී ලංකා ක්‍රිකට් ආයතනය මාධ්‍ය නිවේදනයක් නිකුත් කරමින් පවසයි.
ශ්‍රී ලංකා ක්‍රිකට් ආයතනය මෙම මාධ්‍ය නිවේදනය නිකුත් කර ඇත්තේ 2023 නොවැම්බර් 07 වැනි දින පාර්ලිමේන්තු වරප්‍රසාදවලට මුවා වී ක්‍රීඩා අමාත්‍යවරයා විසින් ප්‍රචාරය කරන ලද අසත්‍ය, ද්වේෂ සහගත සහ නොමඟ යවන සුළු තොරතුරු නිවැරදි කර ඒවාට පිළියම් යෙදීම ශ්‍රී ලංකා ක්‍රිකට් ආයතනයේ අරමුණ බව පවසමිනි.
මෙම මුලපිරීම ICC ක්‍රීඩාංගන ප්‍රමිතීන්ට අනුකූලව දඹුල්ල ක්‍රීඩා පිටියේ පහසුකම් වැඩි දියුණු කිරීම අරමුණු කර ගෙන සිදු කරන ලද්දක් බව එම නිවේදනයෙන් පැවසෙයි.
එම ව්‍යාපෘතිය 2023 ආසියානු කුසලානයට පහසුකම් සැලසීමට ආරම්භ වූ අතර එකල පැවති ආනයන සීමා කිරීම් හේතුවෙන්, එම අවස්ථාවේ නියමිත වේලාවට එය සම්පූර්ණ කිරීමට නොහැකි වූ බව එහි දැක්වේ.
මෙම ව්‍යාපෘතිය සඳහා මහජන ටෙන්ඩරයක් මීට මාස කිහිපයකට පෙර කැඳවන ලද අතර, එම ක්‍රියාවලිය පුරාවටම අමාත්‍යාංශ නියෝජිතයෙකු විසින් සමීපව නිරීක්ෂණය කරන ලදී. ව්‍යාපෘතිය ප්‍රදානය කරන ලද්දේ රජය විසින් අනුමත කරන ලද ටෙන්ඩර් ක්‍රියාවලීන්ට අනුකූලවය.
ශ්‍රී ලංකා ක්‍රිකට් ආයතනය කිසියම් හෝ ආකාරයකින් රු.බිලියන 1.5 ක් විදුලි පහන් ආදේශ කිරීම සඳහා පමණක් යොදා ගත් බව පැවසීම බොරු සහ සහ පදනම් විරහිත බව නිවේදනයේ සඳහන් කර ඇත.
ව්‍යාපෘති කළමනාකරණය අනුව, ව්‍යාපෘතියේ ප්‍රගතිය සහ ගිවිසුම් අවශ්‍යතා අනුව අතුරු ගෙවීම් සිදු කෙරේ. මූල්‍ය අක්‍රමිකතා හෝ අයථා කළමනාකරණය යෝජනා කරන ඕනෑම චෝදනාවක් පදනම් රහිත වන අතර මහජනතාව අතර අනවශ්‍ය අවධානයක් ඇති කිරීමට අදහස් කරන බව පෙනී යන බව එහි සඳහන් වේ.
මීට අමතරව, එම නිවේදනයෙන් පවසා ඇත්තේ ඔවුන්ගේ පත්වීමෙන් පසු කෙටියෙන් ක්‍රියාත්මක වූ අතුරු කමිටු සාමාජිකයින්, SLC පරිශ්‍රයෙන් වැදගත් ව්‍යාපෘති සම්බන්ධ ගෙවීම් වවුචර සහ ලියකියවිලි ඉවත් කර ඇති බවයි.
යහපාලනයේ සහ පාරදෘශ්‍යභාවයේ වැදගත්කම වෙනුවෙන් පෙනී සිටින ඉහත කී සාමාජිකයන්ගේ හැසිරීම ශ්‍රී ලංකා ක්‍රිකට් ආයතනය දැඩි ලෙස ප්‍රතික්ෂේප කරන අතර මෙම ලියකියවිලි වහාම ආපසු ලබා නොදෙන්නේ නම් වගකිවයුත්තන්ට එරෙහිව නීතිමය පියවර ගැනීමට ශ්‍රී ලංකා ක්‍රිකට් ආයතනයට සිදුවන බව එමඟින් අවධාරණය කර ඇත.